ამერიკა-საქართველოს ურთიერთობების გადატვირთვის რა მოლოდინი უნდა მქონდეს? არც მე და არც საქართველოს მოსახლეობის უმრავლესობას არ სჯერა იმის, რასაც მიხეილ ყაველაშვილი ჰყვება, – ამის შესახებ პარტიის, „გახარია საქართველოსთვის“ წევრმა, დეპუტატმა გიორგი შარაშიძემ განაცხადა.
მისივე თქმით, „წარმოუდგენელია, ოლიმპიური თამაშების გახსნის საზეიმო მიღებაზე, ხელის ჩამორთმევისას, ადამიანმა ამდენი რამის თქმა მოასწროს“.
„შეხვედრა სხვანაირი ვიცით, შეხვედრა-შეხვედრაა, როცა ადამიანები მაგიდასთან სხდებიან და საკითხებს განიხილავენ. შეხვედრას რომ შეხვედრა დაარქვა, სულ მცირე, 15 წუთი უნდა გრძელდებოდეს, ამდენი რამის მოსწრება არარეალურია. „ოცნებამ“ რა გააკეთა იმისთვის, რომ ამერიკასთან ურთიერთობა გადატვირთულიყო? – ვხედავთ, ჩვენი მეზობლები სომხეთი და აზერბაიჯანი ამ თვალსაზრისით როგორ წინ არიან შეცვლილი გეოპოლიტიკური მდგომარეობის გათვალისწინებით. ამ ქვეყნებში ამერიკის ვიცე-პრეზიდენტს ელოდებიან და ეს იქნება შეხვედრა. ყაველაშვილს თუ უნდა, გაიგოს, რას ნიშნავს შეხვედრა, ბაქოსა და ერევანში იხილოს. მისი შეხვედრა შეხვედრა არ იყო, ეს იყო ხელის ჩამორთმევა. საიმისოდ რომ აქვთ საქმე, ხელის ჩამორთმევა შეხვედრად გაასაღონ და საქართველოს მოსახლეობას ისე ესაუბრონ, რომ განსაკუთრებული შეხვედრა იყო, ეს მეტყველებს ყველაფერზე, თორემ სრული იზოლაციის ფონზე ამერიკის პირველი პირების მხრიდან ნებისმიერი ყურადღება საქართველოს მიმართ, რა თქმა უნდა, მისასალმებელია. ეს რეალური პროგრესი არ არის, რაზეც ხელისუფლება საუბრობს. შეხვედრა თუ იყო და ამდენი ნიუანსი განიხილეს, ეს კადრები დადონ, ფოტოგრაგი მობილიზებული იყო და ალბათ, არც ოპერატორის მობილიზება გაუჭირდებოდათ. გამოვრიცხავ, რომ მიღებაზე, წამებში ასეთ ნიუანსებზე, წინა ადმინისტრაციაზე ყოფილიყო საუბარი“,- განაცხადა შარაშიძემ.
