გაერთიანებული სამეფოს პრემიერმინისტრ კირ სტარმერსა და ჩინეთის პრეზიდენტ სი ძინპინს შორის პეკინში შეხვედრა გაიმართა, რაც 2018 წლის შემდეგ ბრიტანეთის ლიდერის პირველი ვიზიტია ჩინეთში.
პეკინში ვიზიტის დროს, დიდი ბრიტანეთის პრემიერ-მინისტრმა სი ძინპინს კიდევ ერთხელ დაუდასტურა ლონდონის ერთგულება „ერთიანი ჩინეთის“ პრინციპის მიმართ.
მხარეებმა მსოფლიო მასშტაბით მზარდი ტურბულენტობისა და გაურკვევლობის ფონზე "ყოვლისმომცველი სტრატეგიული პარტნიორობის" აუცილებლობაზე ისაუბრეს.
"ჩინეთი გლობალურ ასპარეზზე უმნიშვნელოვანესი მოთამაშეა და აუცილებელია, რომ გვქონდეს უფრო დახვეწილი ურთიერთობა, რომლის დროსაც შევძლებთ თანამშრომლობას და, ამავე დროს, გვექნება მნიშვნელოვანი დიალოგი იმ საკითხებზე, რომლებშიც უთანხმოება გვაქვს." - უთხრა სტარმერმა ჩინეთის ლიდერს შეხვედრისას.
სი ძინპინის თქმით, შესაძლებელია იმ შედეგის მიღწევა, რომელიც ისტორიის გამოცდას გაუძლებს.
როგორც იუწყებიან, პეკინში ჩინეთის პრეზიდენტ სი ძინპინთან შეხვედრისას სტარმერმა ასევე აღნიშნა, რომ დიდმა ბრიტანეთმა და ჩინეთმა ხელი უნდა შეუწყონ ურთიერთპატივისცემასა და ნდობაზე დაფუძნებულ გრძელვადიან, სტაბილურ და ყოვლისმომცველ სტრატეგიულ პარტნიორობას.
ბრიტანეთის პრემიერ-მინისტრმა დასძინა, რომ ჰონგ-კონგის კეთილდღეობა და სტაბილურობა ორივე ქვეყნის ინტერესებშია.
სტარმერმა მას დიდი ბრიტანეთისა და ჩინეთის დამაკავშირებელი უნიკალური და მნიშვნელოვანი ხიდი უწოდა.
