გორის მუნიციპალიტეტში, ოკუპირებული ტერიტორიის პერიმეტრზე მდებარე სოფელ ერგნეთში, ინციდენტების პრევენციისა და მათზე რეაგირების მექანიზმის ფარგლებში, რიგით 130-ე შეხვედრა მიმდინარეობს.
სუს-ის ანალიტიკური დეტარტამენტის ხელმძღვანელის მოადგილის ცნობით, დღევანდელ შეხვედრაზე უნდა განიხილონ რა მოხდა წინა შეხვედრიდან ამ დრომდე საოკუპაციო, ეგრეთწოდებულ გამყოფ ხაზთან. მთავარი განსახილველი თემა კი უკანონო პატიმრობაში მყოფი პირების გათავისუფლება იქნება.
ბოლო ინფორმაციით, ცხინვალის საოკუპაციო რეჟიმის ტყვეობაში საქართველოს 13 მოქალაქე იმყოფება.
"დღევანდელი შეხვედრის მთავარ თემას ჩვენთვის წარმოადგენს, უკანონო პატიმრობაში მყოფი პირების გათავისუფლების საკითხი. დღეის მდგომარეობით, უკანონო პატიმრობაში 13 პირი იმყოფება. ასევე განვიხილავთ საოკუპაციო ხაზის გასწვრივ საანგარიშო პერიოდში დაფიქსირებულ ყველა მნიშვნელოვან ინცინდენტს. ასევე თავსიუფალი გადაადგილების კუთხით არსებულ შეზღუდვებს.
22 დეკემბრიდან დღევანდელი დღის ჩათვლით, ე.წ. უკანონო ბორდერიზაციას ადგილი არ ჰქონია. ეს იშვიათი მოვლენაა და ვიმედოვნებთ, რომ ეს არ იყო განპირობებული მხოლოდ ამინდით და მსგავსი ტენდენცია შენარჩუნდება.
წინა შეხვედრიდან დღემდე იყო დაკავების 6 შემთხვევა. რაც შეეხება ჩორჩანას, ცენტრალური ხელისუფლების პოზიცია ცნობილია, და იგი არ შეცვლილა. პოლიციის სტანდარტული საგუშაგო დგას და საშტატო რეჟიმში აგრძელებს მუშაობას"- განაცხადა ირაკლი ანთაძემ.
