„დღეს საქართველოს ჰყავს პატრიოტი ხელისუფლება, რომელიც ითვალისწინებს, პირველ რიგში, ქართველი ხალხის ინტერესებს და არავის მიეცემა შესაძლებლობა, რომ საქართველო აბუჩად მოიხსენიოს და ზემოდან უყუროს“, - ასე პასუხობს თბილისის მერი კახა კალაძე ჟურნალისტის კითხვას იმასთან დაკავშირებით, თუ რას ნიშნავს ევრობიუროკრატების დუმილი აშშ-ში მიმდინარე მოვლენებთან დაკავშირებით მაშინ, როდესაც მათი პოზიცია საქართველოსთან მიმართებაში საკმაოდ კრიტიკული იყო.
„ჩვეულებრივი ორმაგი სტანდარტია, სხვა არაფერი. საქართველო პატარა ქვეყანა ნახეს. ეს ჩვენი ბრალიც არის, რადგან მთელი ბოლო წლების განმავლობაში, თუ გადავხედავთ ჩვენს უახლეს ისტორიას, დამოუკიდებლობიდან მოყოლებული, ჩვენი მხრიდან დაშვებული იყო შეცდომები, რომ ამ ადამიანებს ყველაფრის უფლება მივეცით. გაიხსენეთ ის წლები, როდესაც ისინი თუნდაც რაიმე განცხადებას გააკეთებდნენ, ეს იყო სრული ჭეშმარიტება, არავინ შედიოდა შინაარსში, არავინ ახორციელებდა პოლემიკას ამა თუ იმ საკითხზე. უცხოელმა რადგან თქვა, ეს იყო სრული ჭეშმარიტება. ეს არის ძალიან დიდი აბსურდი და ეს იყო ჩვენი პრობლემა, ჩვენს მიერ დაშვებული შეცდომები.
თუმცა, დღეს საქართველოს ჰყავს პატრიოტი ხელისუფლება, რომელიც ითვალისწინებს, პირველ რიგში, საქართველოს და ქართველი ხალხის ინტერესებს. შესაბამისად, არავის მივცემთ შესაძლებლობას, რომ საქართველო აბუჩად მოიხსენიოს, ჩვენს ქვეყანასთან მიმართებაში ჰქონდეს ზემოდან ყურების დამოკიდებულება. ჩვენ ვართ დამოუკიდებელი, სუვერენული სახელმწიფო და ყველამ კეთილი ინებოს და პატივი სცეს ჩვენს სუვერენიტეტსა და დამოუკიდებლობას. რაც შეეხება იმას, რაც ხდება ამერიკაში, ყველამ თავის ქვეყანას უნდა მიხედოს. ყველას აქვს პრობლემები, უპრობლემო ქვეყანა არ არსებობს და ჩვენ, რა თქმა უნდა, ყველაფერს გავაკეთებთ, რომ დავიცვათ ჩვენი ქვეყნის ინტერესი და მივხედოთ ქართველ ხალხს“, - განაცხადა კახა კალაძემ.
