მედიის ცნობით, 18 იანვრის ღამეს უკრაინულმა დრონებმა ბესლანს შეუტიეს. ჩრდილოეთ ოსეთის ხელმძღვანელის, სერგეი მენიაილოს თქმით, დრონის ნამსხვრევები ხუთსართულიანი საცხოვრებელი სახლის სახურავზე დაეცა.
შენობიდან 70 ადამიანი ევაკუირებულია. ერთ-ერთმა მცხოვრებმა სამედიცინო დახმარება ითხოვა. ხუთსართულიანი შენობის სახურავი და ფანჯრები დაზიანდა.
გამოცემა „მედუზას“ ცნობით, ვლადიკავკაზის აეროპორტში, ასევე გროზნოში (ჩეჩნეთის რესპუბლიკა) და მაგასში (ინგუშეთი), მოსკოვის დროით დაახლოებით დილის 5:30 საათზე ფრენებზე დროებითი შეზღუდვები დაწესდა.
რუსეთის თავდაცვის სამინისტროს მტკიცებით, ღამით ჩრდილოეთ ოსეთის თავზე ექვსი დრონი ჩამოაგდეს. სამინისტროს ცნობით, ჯამში რუსეთის რეგიონებში 63 უკრაინული დრონი ჩაჭრეს და ჩამოაგდეს.
