ამერიკული გამოცემა Fox News საქართველოს საპროტესტო აქციებზე სტატიას აქვეყნებს.
„საქართველოში მასობრივი პროტესტები მას შემდეგ დაიწყო, რაც პრორუსულმა „ქართულმა ოცნებამ” არჩევნებში გამარჯვება გამოაცხადა და ქვეყნის ევროკავშირში გაწევრიანების ძალისხმევები შეაჩერა“, - წერს გამოცემა.
„ყოველდღიურად, ქართველები, რომლებიც კვლავ მამაცურად უძლებენ ყინვებს და ხელისუფლების მხრიდან ძალადობის ბრალდებებს, უყურებენ, ირანში დემოკრატიისთვის მებრძოლ დემონსტრანტებს და ხედავენ საკუთარ ბრძოლას კორუმპირებული და არაპოპულარული რეჟიმის წინააღმდეგ“, - აღნიშნულია სტატიაში.
Fox News-ს საქართველოს შესახებ სტატიაში ასევე თავდაცვის ყოფილი მინისტრის, თინათინ ხიდაშელის კომენტარები მოყავს.
„როდესაც ყოველდღიურად დადიხართ თბილისურ დემონსტრაციებზე, ხალხი მხოლოდ ირანზე საუბრობს. მასზე მიმდინარე ცხარე დებატები აჩვენებს, თუ რამდენად მნიშვნელოვანია ის და რამდენად ოპტიმისტურად არიან განწყობილნი ქუჩებში მიმდინარე მოვლენების გამო, დაპირისპირების მიუხედავად. ირანში განვითარებული მოვლენები ადამიანური გამოძახილია: თუ ხალხს შეუძლია დაუპირისპირდეს გაცილებით დესპოტურ და ძალადობრივ რეჟიმს, ეს აძლიერებს რწმენას, რომ საქართველოში წინააღმდეგობა უშედეგო არ არის“, - განუცხადა გამოცემას საქართველოს თავდაცვის ყოფილმა მინისტრმა თინათინ ხიდაშელმა.
