სუს-ის ყოფილი უფროსის, გრიგოლ ლილუაშვილის ადვოკატს საქმის მასალები გადასცეს. როგორც რობერტ გრიგალაშვილმა განაცხადა, მას გაუთქმელობაზე მოაწერინეს ხელი.
"გადმოგვეცა სისხლის სამართლის საქმის მასალები, ძირითადად ელექტრონული სახით მაქვს წამოღებული. მოხდა გადმოწმება, გადავლა იმ არსებული სიის მიხედვით, რომელიც არის ჩამონათვალი ტომების მიხედვით. საკმაოდ მრავალტომიანი საქმეა. 30 ტომია. არის ასევე გარკვეული აუდიო ჩანაწერები, რომლის გაცნობა ფიზიკურად ვერ მოხდებოდა. არ ვიცი ვინ ფიგურირებს ამ ჩანაწერებში. მისი დათვალიერება და შესწავლა არ განხორციელებულა. ეს არის აუდიო ჩანაწერი. რამდენად ეს არის, თქვენ თუ მეკითხებით ოპერატიულ სამძებრო ღონისძიების ფარგლებში ჩატარებული, ამას ვერ გეტყვით, იმიტომ, რომ გასავლელია, თუმცა არმგონია, რომ ეს იყოს ოპერატიულ სამძებრო ღონისძიების შედეგად ჩატარებული, მაგრამ არსი რაღაც ფარული ხმოვანი ჩანაწერები. მე ვნახე მხოლოდ აუდიო, შეიძლება იქ ვიდეოც იყოს. სატელეფონო ანძის ჩანაწერები ამოღებულია თუ არა ეს არ ვიცი, ვერ გეტყვით. გაუთქმელობაზე მოვაწერე ხელი, შესაბამისად, კონკრეტულად რა სისხლის სამართლსის აქმეზე რა მასალებია და რა შინაარსის, ამაზე მე გათქმის ვალდებულება აღარ მაქვს, იმიტომ, რომ ამაზე გაფრთხილებული ვარ. პროკურატურის მოთხოვნა იყო ეს, რა თქმა უნდა. ჩვენთვის პირიქით, საჯაროობა მისაღებია, რომ დავადასტუროთ ჩვენი დაცვის ქვეშ მყოფის უდანაშაულობა", - განაცხადა ადვოკატმა", - თქვა ლილუაშვილის ადვოკატმა პროკურატურიდან გამოსვლის შემდეგ.
გრიგოლ ლილუაშვილს რამდენიმე სისხლის სამართლის საქმეში ქრთამის აღებას ედავებიან. პროკურატურის ინფორმაციით, საუბარია 2 365 000 აშშ დოლარსა და 1 500 000 ლარზე. უფრო კონკრეტულად, გამოძიება მას 4 ეპიზოდს ედავება, ორ მათგანში მასთან ერთად ფიგურირებს ეკონომიკისა და მდგრადი განვითარების მინისტრის ყოფილი მოადგილე, დაკავებული რომეო მიქაუტაძე.პირველი ეპიზოდის მიხედვით, ლილუაშვილმა ქარის ელექტროსადგურების მშენებლობასთან დაკავშირებულ ურთიერთთანამშრომლობის მემორანდუმის გაფორმებისათვის ლობირების გასაწევად თურქი ინვესტორი ჩაღათაი ულქერისგან რომეო მიქაუტაძის მეშვეობით ქრთამის სახით 1 მილიონი აშშ დოლარი აიღო.მეორე ეპიზოდის მიხედვით, ლილუაშვილმა კვლავ რომეო მიქაუტაძის მეშვეობით, კომპანია „ექსპრესსერვისი 2008-ის“ დამფუძნებელ გიორგი ხაჟალიას გაზიფიკაციის ტენდერებში დახმარების სანაცვლოდ 1 მილიონ ხუთასი ათასი ლარი გამოართვა.
მესამე ეპიზოდის მიხედვით, ლილუაშვილი „ქოლ-ცენტრების“ მცირე ნაწილს მფარველობდა, რასაც ის მისი ნათესავის, სანდრო ლილუაშვილის მეშვეობით ახორციელებდა. აღნიშნული დანაშაულებრივი საქმიანობის შედეგად გრიგოლ ლილუაშვილმა ქრთამის სახით, სანდრო ლილუაშვილის შუამავლობით, დაახლოებით 1 365 000 აშშ დოლარი მიიღო.პროკურატურის ცნობით, აღნიშნული ქოლ-ცენტრებიდან დიდი უმრავლესობა პირთა ჯგუფს ეკუთვნოდა, რომლებიც მიღებული შემოსავლებიდან სხვადასხვა ოპოზიციურ მედიასაშუალებას აფინანსებდნენ. მეოთხე ეპიზოდის მიხედვით, გრიგოლ ლილუაშვილი ქრთამის აღების სანაცვლოდ, თავის მეგობარს, თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახა გვანცელაძეს მფარველობას უწევდა, რომელიც საბავშვო ბაღების მიერ განსახორციელებელი შესყიდვების ხელშეკრულებების გაფორმებაში მეწარმე სუბიექტებისგან ქრთამის სახით განსაკუთრებით დიდი ოდენობის თანხებს, ე.წ. „ატკატებს“ იღებდა.
გრიგოლ ლილუაშვილს ბრალი ედება საქართველოს სისხლის სამართლის კოდექსის 338-ე მუხლის მე-2 ნაწილის „გ“ ქვეპუნქტით და მე-3 ნაწილის „ე“ ქვეპუნქტით, რაც წინასწარი შეთანხმებით ჯგუფის მიერ, განსაკუთრებით დიდი ოდენობით ქრთამის აღებას გულისხმობს და სასჯელის სახით 11-იდან 15 წლამდე თავისუფლების აღკვეთას ითვალისწინებს.
