ჩვენი საზოგადოება ნათლად ხედავს, რამდენად მართალი და სწორი პოლიტიკა ჰქონდა „ქართულ ოცნებას“, განსაკუთრებით ბოლო წლის განმავლობაში, ყველაფერი, რაზეც ვსაუბრობდით, სიმართლე აღმოჩნდა, ყველა რისკი, რაზეც ვსაუბრობდით, გაცხადდა და ფარისეველი მხილებული იქნა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
„ქართულმა ოცნებამ“ კიდევ ერთხელ დაადასტურა, თუ რამდენად მნიშვნელოვანი იყო იმ უდიდესი წნეხის გაძლება, რაც მოდიოდა, მათ შორის, ევროკავშირის და ბრიუსელის მხრიდან საქართველოს ხელისუფლების მიმართ მათი და მათი ხელქვეითი „ენჯეოების“, თუ პარტიების ხელით. ამ წნეხის გაძლება რამდენად მნიშვნელოვანი იყო და სად ვიქნებიდით დღეს, ამ წნეხისთვის რომ არ გაგვეძლო. იქ ვიქნებოდით, სადაც დღეს უკრაინა არის, როდესაც აღარც მშვიდობა შეუძლიათ და აღარც ომი. ამ მდგომარეობაში რომ ჩააყენეს ამ ფარისეველმა პოლიტიკურმა ლიდერებმა უკრაინა. თან აგულიანებენ. დღესაც ვხედავთ, რომ აგულიანებენ უკრაინას და ამით, სინამდვილეში კიდევ უარეს მდგომარეობაში შეჰყავთ უკრაინელი ხალხი“, – განაცხადა შალვა პაპუაშვილმა.
რაც შეეხება აშშ-ევროკავშირის ურთიერთობა, მისი თქმით, აშშ-ს და ახალ ადმინისტრაციას განსაკუთრებული როლი აქვს, ღიად და ცხადად უთხრას სიმართლე ევროპელ ბიუროკრატებს თუ პოლიტიკურ ლიდერებს.
„უთხრას ის, რასაც ამდენი ხანია ფუთავენ, როგორც ევროპულობის, ცივილურობის და ა.შ. მაგალითს. სინამდვილეში უთხრას, რომ ამ ევროპულობის და ფსევდო ევროპულობის საფარქვეშ, ევროკავშირი იქცა სიტყვის თავისუფლების შეზღუდვის, დემოკრატიის შეზღუდვის, უმცირესობების მართვის და არა უმრავლესობის ნების გაზიარების, კონფლიქტის და არა მშვიდობის ტერიტორიად. ეს სიმართლე უთხრას პირდაპირ თვალევში ევროპელებს და ვფიქრობ, ის მომენტია, როდესაც ევროპელი ლიდერები უნდა გამოფხიზლდნენ. ისინი აცდნენ საკუთარ ხალხს, ევროპელი ხალხის ნებას და ერთადერთი გამოსავალია, დაუბრუნდნენ საკუთარი ხალხის ნების განხორციელებას, რომელსაც ასე აცდენილი არიან და შედეგიც პირდაპირ უთხრა ამერიკის ადმინისტრაციამ რაც იქნება. ზუსტად ის, რასაც ჩვენ ვსაუბრობდით – ეს არის ევროპული იდენტობის დაკარგვა, ეს არის ბოლო წერტილი, სადაც დღევანდელი ევროპელი ლიდერების მმართველობა მიიყვანს ევროკავშირს, ეს არის ევროპული იდენტობის სრული წაშლა“, – განაცხადა შალვა პაპუაშვილმა.
