ე. წ. არამიანცის კომპლექსში შემავალი 4 კლინიკის შემდეგ დანიელ გუფთამ კიდევ ორი სამედიცინო ობიექტი შეიძინა. ეკონომიკისა და მდგრადი განვითარების სამინისტროში დღეს გამართულ აუქციონზე ის "ანესთეზიოლოგიური კლინიკისა" და "თორაკო-აბდომინალური კლინიკის" მფლობელიც გახდა. გუფთამ პირველ ობიექტში 55 ათასი დოლარი, მეორეში კი 2 100 ათასი გადაიხადა.
"ანესთეზიოლოგიური კლინიკა" წინანდლის ქ. № 9-ში, მე-8 სართულზე მდებარე 80.44 კვ.მ. ფართზეა განთავსებული. ობიექტის საწესდებო კაპიტალი 20462.00 ლარს შეადგენს და მისი საწყისი ღირებულება 50 ათასი ლარი იყო. "ანესთეზიოლოგიური კლინიკას" 61510.00 ლარის დებიტორული და 49204.00 ლარის კრედიტორული დავალიანება აქვს. ინვესტორი ვალდებულია კლინიკას პროფილი მინიმუმ 7 წლის განმავლობაში შეუნარჩუნოს. აუქციონზე გუფთას გარდა სხვა განაცხადი არ შესულა.
რაც შეეხება "თორაკო-აბდომინალური კლინიკას", მისი საწყისი ღირებულება 2 მლნ. ლარით იყო განსაზღვრული. აღნიშნული კლინიკაც წინანდლის ქ. № 9-ში მდებარეობს და 3416.44 კვ.მ. ფართს და მასზე წილობრივად დამაგრებული მიწის ნაკვეთს ფლობს, მათ შორის: მე-4 სართული: 903,21 კვ.მ.
ობიექტის საწესდებო კაპიტალი 1242490.00 ლარს შეადგენს. "თორაკო-აბდომინალური კლინიკას" 218766.93 ლარის დებიტორული დავალიანება და 141761.50 ლარის კრედიტორული დავალიანება აქვს. აუქციონის პირობების თანახმად, ინვესტორი ვალდებულია "თორაკო-აბდომინალური კლინიკას" 7 წლის განმავლობაში პროფილი შეუნარჩუნოს.
შეგახსენებთ, რომ დანიელ გუფთა კომპანია "ამტელ-პროპერტიეს" ერთ-ერთ დირექტორს წარმოადგენს. 25 იანვარს მან ეკონომიკისა და მდგრადი განვითარების სამინისტროსგან 330 ათას ლარად "ზოგადი თერაპიის კლინიკა", 740 ათას ლარად შპს "ძმები ზუბალაშვილების სახელობის პედიატრიული კლინიკა" და 500 ათას ლარად შპს "თვალის სნეულებათა კლინიკა მზერა" შეიძინა. ხოლო 20 იანვარს გუფთამ 720 ათას ლარად "გინეკოლოგიური კლინიკა" იყიდა.
