შეერთებული შტატების პრეზიდენტ დონალდ ტრამპის ადმინისტრაცია საიდუმლო მოლაპარაკებებს აწარმოებს რუსეთის ხელისუფლებასთან უკრაინაში ომის დასრულების ახალ გეგმაზე. ამის შესახებ გამოცემა Axios-ი წერს ამერიკის შეერთებული შტატებისა და რუსეთის ოფიციალურ პირებზე დაყრდნობით.
გამოცემის ინფორმაციით, ეს გეგმა შთაონებულია ღაზის სექტორში პრობლემის მოსაგვარებლად ტრამპის ინიციატივის წარმატებით.
გეგმა 28-პუნქტიანია და 4 ასპექტად არის დაყოფილი: მშვიდობა უკრაინაში, უსაფრთხოების გარანტიები, უსაფრთხოება ევროპაში და ვაშინგტონის მომავალი ურთიერთობები მოსკოვსა და კიევთან.
Axios-ის მტკიცებით, გეგმის შემუშავებას სათავეში უდგას პრეზიდენტ ტრამპის სპეციალური წარმომადგენელი სტივენ უიტკოფი, რომელსაც ამ საკითხთან დაკავშირებით კომუიკაცია აქვს რუსეთის პრეზიდენტის სპეციალურ წარმომადგენელ კირილ დმიტრიევთან.
დმიტრიევი მაიამიში 24-დან 26 ოქტომბრამდე იმყოფებოდა და აღნიშნა, რომ სამი დღე უიტკოფთან და ტრამპის გუნდის სხვა წევრებთან მოლაპარაკებებში გაატარა.
"უიტკოფთან აშშ-ში სამდღიანი პროდუქტიული შეხვედრები გვქონდა - ჩვენ განვიხილეთ მშვიდობის, ვაჭრობისა და ეკონომიკური თანამშრომლობის გზა. მალე შემდგომი პროგრესი მოსალოდნელია", - წერს დმიტრიევი X-ზე.
Axios-ი არ ავრცელებს დეტალებს სამშვიდობო გეგმის ან მხარეების პოზიციების შესახებ უკრაინაში ტერიტორიულ საკითხებთან დაკავშირებით. 18 ნოემბერს დმიტრიევმა პორტალს განუცხადა, რომ რუსეთმა და შეერთებულმა შტატებმა კიდევ ერთი პატიმრის გაცვლის შესაძლებლობა განიხილეს.
