საპარლამენტო უმცირესობა ციხეებში პატიმრების რაოდენობის ზრდა აშფოთებთ.
ამის შესახებ განცხადება პლენარულ სხდომაზე "ქრისტიან-დემოკრატმა" ლევან ვეფხვაძემ გააკეთა. მან ხელისუფლებას უსაყვედურა, რომ 30 ლარის გამო ადამიანს 3-5 წელს უსჯიან.
"ციხეში ხვდება ყველა, ვის ჩასმასაც პროკურატურა მოისურვებს. პროკურორი რასაც ამბობს, იმას ეთანხმება მოსამართლე", - განაცხადა ლევან ვეფხვაძემ.
მისივე თქმით, თუ პატიმრების რაოდენობა გადაითვლება, 100 ადამიანზე ერთი ან ორი კრიმინალი მოდის., რაც აბსურდულია.
"ღმერთმა დაგვიფაროს, რომ 100 ადამიანზე ერთი კრიმინალი მოდიოდეს. თქვენ კარგად იცით, რომ დღეს ციხეში არა მხოლოდ დამნაშავეები, ასევე ბევრი უდანაშაულო ადამიანი ზის", - აღნიშნა ვიცე-სპიკერმა.
მისივე ინფორმაციით, ამ დროისთვის სასჯელაღსრულების დაწესებულებებში 25000 პატიმარია, აქედან 5 500-მდე ადამიანი მხოლოდ 2010 წელს დაემატა.
დეპუტატს ადამიანის უფლებათა დაცვის კომიტეტის თავმჯდომარე ლაშა თორდია და დეპუტატი რატი სამყურაშვილი გამოეხმაურნენ.
ლაშა თორდიას განცხადებით, თავის დროზე ყველა ოჯახს შეექმნა პრობლემა მომეტებული კრიმინალური ვითარების გამო და საპატიმროებში სწორედ ის ადამიანები არიან, ვინც საზოგადოების წინაშე დანაშაული ჩაიდინეს.
რატი სამყურაშვილმა კი ოპოზიცია ძველი სიბრძნის უგულვებელყოფაში დაადანაშაულა.
"თქვენ არ ითვალისწინებთ, რომ ნემსის ქურდი და აქლემის ქურდი ერთია", - აღნიშნა სამყურაშვილმა.
