აშშ-ის პრეზიდენტმა დონალდ ტრამპმა ხელი მოაწერა კანონპროექტს ფედერალური მთავრობის დროებით დაფინანსების შესახებ, რითაც ოფიციალურად დასრულდა ქვეყნის ისტორიაში ყველაზე ხანგრძლივი „შათდაუნი“. ამის შესახებ CNN იუწყება.
კანონპროექტი თეთრ სახლში პრეზიდენტს ხელმოსაწერად წარმომადგენელთა პალატის მიერ მისი მიღებისთანავე გადაეგზავნა.
ტრამპის მიერ კანონის ხელმოწერა სამთავრობო სტრუქტურების მუშაობის აღდგენის საბოლოო ნაბიჯი იყო.
კონგრესის ქვედა პალატაში კანონპროექტს მხარი რესპუბლიკური პარტიის თითქმის ყველა წევრმა და ექვსმა დემოკრატმა დაუჭირა.
მიღებული დოკუმენტი ითვალისწინებს დროებით დაფინანსებას, რომელიც 30 იანვრამდე გაგრძელდება.
ეს ნიშნავს, რომ კონგრესს იანვრის ბოლოს კვლავ მოუწევს ბიუჯეტზე მოლაპარაკებების დაწყება.
ამავდროულად, კანონპროექტი შეიცავს მნიშვნელოვან დებულებას, რომელიც ითვალისწინებს სამთავრობო ძირითადი პროგრამებისა და სააგენტოების დაფინანსებას 2026 წლის ბოლომდე.
