საფრანგეთის საგარეო საქმეთა მინისტრმა ჟან-ნოელ ბარომ განაცხადა, რომ სამხრეთ ამერიკის სანაპიროსთან საერთაშორისო წყლებში გემებზე აშშ-ის მიერ განხორციელებული დარტყმები საერთაშორისო სამართლის დარღვევაა.
„ჩვენ შეშფოთებით ვაკვირდებით კარიბის ზღვის აუზში მიმდინარე სამხედრო ოპერაციებს, რადგან ისინი საერთაშორისო სამართალს არღვევს. ამ რეგიონში მილიონზე მეტი ჩვენი თანამემამულე ცხოვრობს, ამიტომ მათზე შეიძლება, გავლენა იქონიოს ნებისმიერი ესკალაციით გამოწვეულმა არასტაბილურობამ, რომლის თავიდან აცილებაც ცხადია, გვსურს“, – განაცხადა ბარომ კანადაში, დიდი შვიდეულის საგარეო საქმეთა მინისტრების სამიტის დაწყებამდე.
ფრანგული მხარე მიიჩნევს, რომ აშშ-ის ქმედებები, როგორიცაა გემებზე თავდასხმები, არღვევს საერთაშორისო და საზღვაო სამართალს.
მან შეშფოთება გამოთქვა შეერთებული შტატების ქმედებებთან დაკავშირებით, რომელიც, მისი თქმით, ისეთი სამართლებრივი მეთოდების ნაცვლად, როგორიცაა დაპატიმრებები და სხვა ქვეყნებთან თანამშრომლობა, ძალას იყენებს, მაგალითად, იმ გემებზე თავდასხმისას, რომლებიც შესაძლოა ნარკოტიკებით ვაჭრობასთან იყოს დაკავშირებული.
საფრანგეთი ნარკოტიკებით ვაჭრობის პრობლემის მოგვარებას სამართლებრივი მეთოდებით [ნარკორეალიზატორების დაპატიმრება და საერთაშორისო თანამშრომლობა], სთავაზობს.
საფრანგეთი იზიარებს შეშფოთებას ნარკოკარტელების მიერ უსაფრთხოებისთვის შექმნილ საფრთხესთან დაკავშირებით, თუმცა მოუწოდებს ამ საფრთხესთან საბრძოლველად სამართლებრივი საშუალებების გამოყენებისკენ.
აშშ-მა კარიბის ზღვის აუზსა და წყნარი ოკეანის სანაპიროებთან გემებზე აქამდე, სულ მცირე, 19 დარტყმა განახორციელა, რის შედეგადაც, სულ მცირე, 76 ადამიანი დაიღუპა.
