„ერთიანმა ნაციონალურმა მოძრაობამ“ შეიტანა საკონსტიტუციო სარჩელი ამ მოღალატეთა და კრიმინალთა ბანდის მიერ საქართველოს კანონმდებლობის დარღვევასთან დაკავშირებით. ბუნებრივია, ჩვენთვის ძალიან მნიშვნელოვანია, რომ ეს პროცესი არ იყოს მხოლოდ ერთი პარტიის საზრუნავი და თემა, რადგან საქმე ეხება საქართველოს კონსტიტუციის დარღვევას, საქართველოში დემოკრატიის საფუძვლების მორღვევას,- ამის შესახებ „ერთიანი ნაციონალური მოძრაობის“ პოლიტიკურმა მდივანმა, გიორგი ბარამიძემ ჟურნალისტებს განუცხადა.
„ეს არ არის რუსული კოლაბორანტული რეჟიმის მიერ მხოლოდ ერთი პარტიის წინააღმდეგ მიმართული ქმედება ან მხოლოდ ერთი პარტიის გაუქმებისთვის გადადგმული ნაბიჯები. კრემლი, პუტინის გეგმის შესაბამისად, მისი მარიონეტების ხელით ცდილობს საქართველოში ის საფუძვლები მოარღვიოს, რაზეც დგას ნებისმიერ ქვეყანაში დემოკრატია. ებრძვის პოლიტიკურ პარტიებს, არასამთავროო ორგანიზაციებს, თავისუფალ აზრს, მედიას და ნებისმიერ განსხვავებულ აზრს, რომელიც მათთვის ხელსაყრელი არ არის“,-განაცხადა ბარამიძემ.
მისი თქმით, აღნიშნული საქმე სტრასბურგის სასამართლოში წავა.
„ჩვენ არანაირი ილუზია არ გაგვაჩნია ჯიბის საკონსტიტუციო სასამართლოში წარმატებასთან დაკავშირებით, რადგან მას თავიდან ბოლომდე აკონტროლებს ივანიშვილის კრიმინალურ, რუსული მოღალატური ბანდა, მაგრამ ეს მნიშვნელოვანია ერთი მხრივ, პოლიტიკური პროცესის წარსამართად, რადგან ეს თავიდან ბოლომდე პოლიტიკურად მოტივირებული საქმეა. რა არის სიმართლე, რა არის პროპაგანდა, ეს ყველაფერი საზოგადოებამ უნდა იცოდეს და ვეცდებით სწორედ ამ პროცესის მეშვეობით მივაწოდოთ საზოგადოების ობიექტური ინფორმაცია. რაც შეეხება წმინდა იურიდიულ საკითხს, ჩვენ არ ვაპირებთ ამ ჯიბის სასამართლოს იმედად დავტოვოთ საკითხი და ყველა იმ ეტაპს გავივლით, რაც აუცილებელია იმისთვის, რომ ეს საქმე წავიღოთ ევროსასამართლოში. სტრასბურგში იქნება ნამდვილი, დამოუკიდებელი, მიუკერძოებელი სასამართლო, სადაც ყველაფერს თავის პასუხს გასცემენ და სამართლებრივ შეფასებას მისცემენ“,-განაცხადა ბარამიძემ.
