ლატვიის სეიმმა „სტამბოლის კონვენციიდან“ ქვეყნის გასვლის განუსაზღვრელი ვადით გადადებას დაუჭირა მხარი, - მედიის ინფორმაციით, ამის შესახებ ლატვიის პრემიერ-მინისტრმა ევიკა სილინამ განაცხადა.
„ლატვიის პარლამენტმა გადაწყვიტა, რომ „სტამბოლის კონვენციიდან“ გასვლა უვადოდ გადაიდოს. მე ვესალმები ამ გადაწყვეტილებას. ეს არის დემოკრატიის, კანონის უზენაესობისა და ქალთა უფლებების გამარჯვება. ეს ლატვიელი ხალხის გამარჯვებაა. ლატვია საიმედო პარტნიორი და მოკავშირეა და ევროპული ღირებულებების ერთგული რჩება“, – წერს ლატვიის პრემიერ-მინისტრი სოციალურ ქსელში.
მანამდე ლატვიის პრეზიდენტმა, ედგარს რინკევიჩმა თხოვნით მიმართა პარლამენტს, ხელახლა განეხილათ კანონი „სტამბოლის კონვენციიდან“ გასვლის შესახებ. ლატვიის სეიმმა დაამტკიცა კანონპროექტი, რომელიც ქალთა მიმართ და ოჯახში ძალადობის პრევენციისა და მასთან ბრძოლის შესახებ „სტამბოლის კონვენციიდან“ გასვლას ითვალისწინებს. ინიციატივა ლატვიის მემარჯვენე კონსერვატიული პარტიის, „ეროვნული გაერთიანების“ დეპუტატების მიერ არის წარდგენილი.
მათი მტკიცებით, კონვენცია ქვეყნის ღირებულებებს ეწინააღმდეგება. კონვენციიდან გასვლის წინააღმდეგ სეიმთან საპროტესტო აქციაც გაიმართა. არასამთავრობო ორგანიზაციების შეფასებით, კონვენციიდან გასვლა იქნება ნაბიჯი აგრესორ სახელმწიფოებთან დაახლოებისკენ.
კონვენციის მოწინააღმდეგეები მიიჩნევენ, რომ ის ტრადიციულ ოჯახურ ღირებულებებს ეწინააღმდეგება. მაგალითად, ზოგიერთი დოკუმენტს „გენდერის“ განმარტების გამო აკრიტიკებს. მათი მტკიცებით, არსებული ეროვნული კანონმდებლობა საკმარისია გენდერული ძალადობის წინააღმდეგ საბრძოლველად.
კონვენციას პირველად ხელი მოეწერა სტამბოლში 2011 წელს და ძალაში შევიდა სამი წლის შემდეგ. ევროკავშირის ქვეყნების უმეტესობამ დოკუმენტს ხელი მოაწერა და მისი რატიფიცირება მოახდინა.
