4 ნოემბერს ნიუ იორკის მერის არჩევნებში დემოკრატიული პარტიის კანდიდატმა ზოჰრან მამდანიმ დამაჯერებელი გამარჯვება მოიპოვა.
წინასწარი არაოფიციალური შედეგებით, მამდანიმ ხმების 50.4% მიიღო. 34 წლის ზოჰრან მამდანი, თავს სოციალისტსაც უწოდებს.
მისი მთავარი კონკურენტი ნიუ-იორკის ყოფილი გუბერნატორი ენდრიუ კუომო იყო, რომელმაც მამდანისთან დემოკრატების ნომინაცია წააგო და საბოლოოდ დამოუკიდებელ კანდიდატად იყარა კენჭი.
კუომომ ხმების 41.6% მოიპოვა, ხოლო რესპუბლიკელმა კანდიდატმა კურტის სლივამ - 7.1%.
ნიუ იორკის გარდა არჩევნები ჩატარდა ნიუ ჯერსიში, ვირჯინიაში და კალიფორნიაში. ნიუ ჯერსისა და ვირჯინიაში დემოკრატმა კანდიდატებმა გაიმარჯვეს, ხოლო კალიფორნიაში ხმის მიცემა ჯერ კიდევ გრძელდება.
არჩევნების შედეგების ოფიციალურად დადასტურების შემდეგ ზოჰრან მამდანი გახდება ნიუ-იორკის პირველი მუსლიმი მერი.
ზოჰრან მამდანი უგანდაში დაიბადა. ოჯახი ნიუ-იორკში დასახლდა, როცა ზოჰრან მამდანი შვიდი წლის იყო. უმაღლესი განათლება მიღებული აქვს ჰუმანიტარულ მეცნიერებათა ბოუდინ-კოლეჯში, რომელიც მენის შტატში მდებარეობს. ზოჰრან მამდანის მამა ინდოეთში დაბადებული უგანდელია, დედა - ინდოელი.
