"ჩვენ შევამცირეთ გადასახადები, მაგრამ გვქონდა ხისტი ადმინისტრირება, რაც იყო გამოძახილი იმ კორუფციული ურთიერთობებისა, რომლებიც ადრე არსებობდა",- განაცხადა ფინანსთა მინისტრმა ბიზნესმენებთან შეხვედრისას.
მინისტრის თქმით, დღეს ეს ვითარება შეცვლილია და „ახალი კურსი" სწორედ არსებულ რეალობას პასუხობს.
"ჩვენ შევცვალეთ საგადასახადო კოდექსი; ბევრი სიახლე უკვე მოქმედებს. მაგალითად 200 ათასზე მეტი ბრუნვის კომპანიები საბაჟოზე აღარ იხდიან დამატებული ღირებულების გადასახადს; დაინიშნა საგადასახადო ომბუდსმენი; რეალურად პრაქტიკაში უკვე დავნერგეთ GOOD FAITH - პრინციპი და უკვე ბევრი კომპანიაა, ვინც რეალურად ნახა ამ პრინციპს გამოყენება პრაქტიკაზე; ამუშავდა წინასწარი გადაწყვეტილება; პირადი საგადასახადო აგენტი; გაფრთხილება დაჯარიმების ნაცვლად და ასე შემდეგ. რა თქმა უნდა, შეცდომებისგან დაზღვეულები არა ვართ და ბუნებრივია კიდევ ბევრ რამეს შევცვლით, გავაუმჯობესებთ, მაგრამ მთავარია მუდმივი მჭიდრო კომუნიკაციის შენარჩუნება ბინზესთან, რომ ჩვენ ზუსტად გვესმოდეს მათი პრობლემების და სწრაფად ვახდენედეთ რეაგირებას.
ჩვენ გვინდა რომ ახალი კურსის ფარგლებში დაწყებული ინიციატივები სწრაფად კი არ დასრულდეს, არამედ სისტემურ თანამშრომლობად ჩამოყალიბდეს. ვიფიქროთ კიდევ რა არის დამატებით გასაკეთებელი. ვიცი, რომ საგადასახადოში მიმდინარე რეფორმების ყველა მიმართულება ძირითადად მოწონებას იმსახურებს, მაგრამ არის დარიცხვების მიმართულება, სადაც მაინც არის კითხვის ნიშნები, თუმცა ესეც ძველ პერიოდს უკავშირდება, მაგრამ მაშინ შემოწმებულ კომპანიებს დღეს უდგებათ გადასახადების ვადები. ამ მხრივ ჩვენ ერთი სისტემური ნაკლოვანება უკვე გამოვასწორეთ და ამიერიდან ყველა კომპანიას შეეძლება წინასწარ გაეცნოს აუდიტორების დასკვნას, რათა თავიდან ავიცილოთ შესაძლო შეცდომა ან უბრალოდ რაიმე ინფორმაციის არქონის გამო გამოწვეული დარიცხვა. აქაც კიდევ ერთხელ ჩვენ მზად ვართ გადავხედოთ პრაქტიკას და განსკაუთრებით გასული პერიოდის დარიცხვებს, რომ თუ შესაძლებელია შევამსუბუქოთ კომპანიების მდგომარეობა, ვინაიდან ამ საშუალებით თანხების მობილიზება ჩვენი მიზანი ნამდვილად არ გახლავთ",- განაცხადა ფინანსთა მინისტრმა.
მინისტრის თქნით, ინფრასტრუქტურის ძირითადი განახლება პრაქტიკულად სრულდება. თბილისის და ბათუმის გეზები უკვე ფუნქციონირებს, მას 11 თებერვალს ფოთის გეზი დაემატება, ხოლო 26 მაისს სარფის საბაჟოც გაიხსნება.
შეგახსენებთ, რომ დღეს ბათუმში საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდა.
შეხვედრა მიზნად ისახავდა ბიზნესსა და სახელმწიფო ინსტიტუტებს შორის დიალოგისა და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.