ენერგეტიკული სექტორი ქვეყნის ეკონომიკის განვითარების ერთ-ერთი პრიორიტეტული მიმართულებაა.
როგორც დღეს "ბათუმის შერატონში" გამართულ შეხვედრაზე ფინანსთა მინისტრმა განაცხადა, ამ მხრივ სახელმწიფო აუცილებელი „ძრავის" ფუნქციას ასრულებს.
"ჩვენ ვაფინანსეთ ისეთ პროექტს, როგორიცაა 500 კილოვატიანი საექსპორტო გადამცემი ხაზის მშენებლობა და რამაც განსაკუთრებით ხელი უნდა შეუწყოს ამ დარგში კერძო კაპიტალის შემოსვლას ჰესების მშენებლობისთვის. აქ მნიშვნელოვანია სახელმწიფო ენერგეტიკული კომპანიების გამართული ფუნქციონირება და მათი განსაკუთრებით მჭიდრო მუშაობა ინვესტორებთან, თქვენთან, რათა მათ მიერ განხორციელებულ კაპიტალურ ხარჯებს მოჰყვეს კონკრეტული კერძო პროექტები"- აღნიშნა ბაინდურაშვილმა.
მისივე განმარტებით მნიშვნელოვანია ასევე კვაზი-სახელმწიფოს ეფექტური ფუნქციონირება სხვა სექტრებშიც.
"სოფლის მეურნეობა ასევე წარმოადგენს შემდგომი განვითარების პრიორიტეტს და აქაც დღეს ყველა აღიარებს, რომ სახელმწიფო ინვესტიციების გარეშე ჩვენ გარღვევა ვერ გვექნება. აქაც ჩვენ გვყვავს სახელმწიფო კომპანიები, როგორებიცაა საირიგაციო კომპანიები და მათი როლი ირიგაციის მნიშვნელობიდან გამომდინარე სრულიად კრიტიკულია"- აღნიშნა ბაინდურაშვილმა.
მინისტრის თქმით, ანალოგიური ვითარებაა ტურიზმის სფეროშიც.
"ჩვენ ვნახეთ, რომ ბათუმში, ანაკლიაში, მესტიაში მხოლოდ სახელმწიფოს მხრიდან ინვესტიციების ჩადების შემდგომ გახდა შესაძლებელი მათი განვითარების დაწყება, მაგრამ რასაკვირველია ბიზნესის ფართო ჩართულობის პირობებში. ამ რეალიების გათვალისწინებით ჩვენ მომდევნო პერიოდში ფოკისურებული ვიქნებით სწორედ ამ დარგების განვითარებაზე და ასევე მცირე და საშუალო წარმოებაზე. დარგებში, სადაც ცალსახად გამოკვეთილია საინვესტიციო ნიშები, ესენია: ლოგისტიკა, ფარმაცეფტიკა, ტექსტილი, სამშენებლო მასალები და სხვა,"- აცხადებს ბაინდურაშვილი.
შეგახსენებთ, რომ დღეს ბათუმში საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდა.
შეხვედრა მიზნად ისახავდა ბიზნესსა და სახელმწიფო ინსტიტუტებს შორის დიალოგისა და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.