უკრაინის პრეზიდენტი ვოლოდიმირ ზელენსკი ევროკავშირის მიერ რუსეთის წინააღმდეგ სანქციების მე-19 პაკეტის დამტკიცებას ეხმიანება.
როგორც ზელენსკი აღნიშნავს, სასიცოცხლოდ მნიშვნელოვანია, რომ ევროკავშირმა, გაერთიანებულმა სამეფომ და აშშ-მა ერთად იმოქმედონ რუსეთზე ზეწოლის გასაძლიერებლად.
„მადლობას ვუხდი ევროკავშირს და ყველა წევრ სახელმწიფოს ძლიერი სანქციების მე-19 პაკეტის მიღებისთვის.
ეს ევროპული ერთიანობის დემონსტრირებაა იმ დროს, როდესაც რუსეთი ომის ესკალაციას ახდენს და მშვიდობიან მოსახლეობაზე თავდასხმებს აძლიერებს.
შეზღუდვები სწორედ იმას ეხება, რაც მოსკოვს ამ ომის გაგრძელებაში ეხმარება: ნავთობისა და გაზის სექტორს, "ჩრდილოვან ფლოტს" და სამხედრო-სამრეწველო კომპლექსს.
პირველად, სანქციები დაეკისრა კრიპტო პლატფორმებსა და კრიპტოვალუტის სქემებს, რომლებსაც რუსეთი შეზღუდვების გვერდის ავლისთვის იყენებს.
სასიცოცხლოდ მნიშვნელოვანია, რომ ევროკავშირმა, გაერთიანებულმა სამეფომ და აშშ-მა ერთად იმოქმედონ რუსეთზე ზეწოლის გასაძლიერებლად და მშვიდობის დასამყარებლად, რომელიც ყველას გვჭირდება.
სასნქციო ზეწოლა უნდა გაიზარდოს და ამას დღეს ბრიუსელში ჩვენს პარტნიორებთან ერთად განვიხილავთ“, - წერს ზელენსკი.
შეგახსენებთ, ევროკავშირმა რუსეთის წინააღმდეგ ახალი, მე-19 სანქციების პაკეტი დაამტკიცა, რომელიც მოიცავს ნავთობტანკერების ე.წ. „ჩრდილოვანი ფლოტის“ წინააღმდეგ ზომებს და თხევადი ბუნებრივი აირის იმპორტის აკრძალვას.
