სლოვაკეთი მხარს დაუჭერს რუსეთის წინააღმდეგ ევროკავშირის სანქციების მე-19 პაკეტს, რომელიც 23 ოქტომბერს ბრიუსელში დაგეგმილ ევროპული საბჭოს სხდომაზე განიხილება. ამის შესახებ სლოვაკეთის პრემიერ-მინისტრმა რობერტ ფიცომ განაცხადა.
ფიცოს თქმით, სანქციებზე დათანხმების სანაცვლოდ, სლოვაკეთმა მიაღწია იმას, რომ ევროკომისიამ უნდა შესთავაზოს ნაბიჯები ევროკავშირში ელექტროენერგიის ფასების შესამცირებლად, ასევე გადახედოს შიდა წვის ძრავიანი ავტომობილების გაყიდვების შეჩერების გეგმას.
სლოვაკეთის პრემიერ-მინისტრი კვლავ მიიჩნევს, რომ რუსეთის წინააღმდეგ ევროკავშირის სანქციები, რომლებიც უკრაინაში რუსეთის სრულმასშტაბიანი აგრესიის საპასუხოდ იქნა დაწესებული, არაეფექტურია.
„სანქციების პაკეტები არაეფექტურია. მათ ერთადერთი, რაც მიაღწიეს, არის ის, რომ რუსები ახლა თვითკმარი არიან, რაც ადრე ასე არ იყო“, - თქვა ფიცომ.
მან განაცხადა, რომ მოუწოდებს ევროპის საბჭოს, ყურადღება ევროპის პრობლემებზე გაამახვილოს და არ დაუშვას, რომ „ევროკავშირის ყველა სამიტის მთავარი თემა უკრაინა, უკრაინა და კიდევ უკრაინა იყოს“.
ახალი სანქციების პაკეტის დასამტკიცებლად ევროკავშირის ყველა ქვეყნის ერთსულოვანი თანხმობაა საჭირო.
მანამდე ცნობილი გახდა, რომ უნგრეთის პრემიერ-მინისტრ ვიქტორ ორბანს 23 ოქტომბერს დაგეგმილ ევროპული საბჭოს სხდომაზე დააგვიანდებოდა. მან თავისი ხმა სლოვაკეთის პრემიერ-მინისტრს, ფიცოს გადასცა.
