როგორც დღეს კახა ბაინდურაშვილმა ბათუმში, "ბიზნეს ასოციაციის" მიერ მოწყობილ მთავრობის წევრებისა და ბიზნესის წარმომადგენლების შეხვედრაზე განაცხადა, ფინანსთა სამინისტროს ოფიციალური პროგნოზით 2011 წლის ეკონომიკური ზრდა 4.5%-ი იქნება.

"ყურადღებას გავამახვილებ ერთ ფაქტზე, რაც ხშირად ეშლებათ ხოლმე და არასწორი შეფასებების მიზეზი ხდება. ფინანსთა სამინისტროს ოფიციალური პროგნოზი 2011 წლის ეკონომიკური ზრდისათვის გახლავთ 4.5%, ეს ის ციფრია, რაც წერია 2011 წლის სახელმწიფო ბიუჯეტის შესახებ კანონში, ვინაიდან თვითონ ეს კანონი „დამაიმედებელი" ეკონომიკური ზრდის პროგნოზის გაცხადებას კი არ ითვალისწინებს, არამედ პროგნოზის ჩვენებას, რომელზეც შემდგომში აგებულია ფისკალური პოლიტიკა, ანუ შემოსავლები, დეფიციტი, ვალების მოცულობა და სხვა. 2008 წლიდან დაწყებული, ანუ კრიზისიდან ჩვენ გადავედით ე.წ. მაღალი და დაბალი სცენარების პროგნოზირებაზე და ჩვენი ფისკალური პოლიტიკა ემყარება დაბალ სცენარს და ასე გაგრძელდება, სანამ არ დავრწმუნდებით, რომ მსოფლიო ეკონომიკა სრულად დაუბრუნდა ჯანსაღ ზრდას. ასეთი დაგეგმვა თავიდან გვარიდებს პოტენციურ საგარეო ეკონომიკურ საფრთხეებს. მაგ. თუ ევროპაში სავალო კრიზისი გაღრმავდება, ის აისახება საქართველოდან ევროპაში ექსპორტზე, შესაბამისად ჩვენი საწარმოების ბრუნვაზე და ეკონომიკის ზრდა ჩვენთან შესაძლოა შეფერხდეს; ამგვარი რისკების არსებობის პირობებში დაბალ პროგნოზზე მუშაობა ნიშნავს, რომ ჩვენ სწორედ ასეთი საფრთხეებისგან შედარებით დაცულები ვართ, ვინაიდან ჩვენი სცენარი ისედაც შესაძლებელზე ნაკლებ ზრდას ითვალისწინებს. სწორედ ამიტომ ჩვენ არ გვეშინია, რომ პროგნოზირებადი საგარეო საფრთხეების პირობებში უცაბედად მოხდეს ჩვენი დეფიციტის, ან საგარეო ვალის ტვირთის ზრდა, ან პრობლემა შეექმნება შემოსულობებს",- განაცხადა კახა ბაინდურაშვილმა ბათუმში ბიზნესმენებთან შეხვედრისას.
ფინანსთა მინისტრის განმარტებით, დაგეგმილი ეკონომიკური ზრდის პირობებში საერთო მთავრობის ხარჯებმა მშპ-სთან მიმართებაში 31.2% შეადგინა, გასულ წელს ანალოგიური მაჩვენებელი 34.6% იყო, ხოლო ამ ბოლო წლების განმავლობაში ქვეყანას ყველაზე მაღალი ხარჯები გვქონდა 2009 წელს - 37.2% ქონდა, რაც ეკონომიკის სტიმულირებას უკავშირდებოდა.

"თუ მომდევნო წლებს წარმოვიდგენთ, ხარჯები კიდევ უფრო იკლებს და ამ ეტაპზე დაგეგმილი გვაქვს, რომ 2012 წელს მათი მოცულობა არ გადააჭარბებს 30%-ს, ხოლო 2013 წელს შემცირდება 27.5%-ზე"- განაცხადა ფინანსთა მინისტრმა.

შეგახსენებთ, რომ დღეს ბათუმში საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდა.

შეხვედრა მიზნად ისახავდა ბიზნესსა და სახელმწიფო ინსტიტუტებს შორის დიალოგისა და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.