"მსოფლიო ეკონომიკური კრიზისის შემდგომ საქართველოს ეკონომიკა ზრდის ტენდენციას დაუბრუნდა. გასულ წელს ჩვენი ეკონომიკა 6%-ით გაიზარდა,"- ამის შესახებ ფინანსთა მინისტრმა კახა ბაინდურაშვილმა, ბათუმში, "ბიზნეს ასოციაციის" მიერ გამართულ მთავრობის წევრებისა და ბიზნესის წარმომადგენლების შეხვედრაზე განაცხადა.
ბაინდურაშვილის განმარტებით, სხვა ქვეყნებისგან განსხვავებით, საქართველო განვითარების გზას უკვე დაუბრუნდა.
"კიდევ უფრო მნიშვნელოვანია, რომ თვით კრიზისის განმავლობაში 2009 წელს საქართველოს ეკონომიკის ვარდნა 4% არ ყოფილა მასშტაბური და რაც მთავარია მას არ მოჰყოლია ისეთი ფუნდამენტური პრობლემები, როგორებიცაა სექტორული კოლაფსები, საბანკო კრიზისები და სხვა. კრიზისიდან ამგვარი დაღწევის ძირითადი ეკონომიკური მიზეზი ფისკალური სტიმულირება გახლავთ, არაპირდაპირი ფისკალური სტიმულირება, რისი განხორციელების საშუალებაც ჩვენ მოგვეცა 4.5 მილიარდი აშშ დოლარის ოდენობის დახმარების პაკეტის მიღების შემდეგ. თუმცა დღეს, როდესაც მთავრობა პრაქტიკულად გამოვიდა ფისკალური სტიმულირებიდან, დღის წესრიგში დგება ეკონომიკის ზრდის ტენდენციის შენარჩუნება არასაბიუჯეტო სტიმულირების პირობებში",- განაცხადა კახა ბაინდურაშვილმა.
შეგახსენებთ, რომ დღეს ბათუმში საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდა.
შეხვედრა მიზნად ისახავდა ბიზნესსა და სახელმწიფო ინსტიტუტებს შორის დიალოგისა და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.
