ევროპის ქვეყნები უკრაინასთან ერთად 12-პუნქტიან წინადადებაზე მუშაობენ, რათა რუსეთის ომი ამჟამინდელ საბრძოლო ხაზებზე დასრულდეს. ამის შესახებ Bloomberg იუწყება.
გამოცემა ინფორმირებულ წყაროებზე დაყრდნობით იუწყება, რომ გეგმის განხორციელებას აშშ-ის პრეზიდენტის დონალდ ტრამპის თავმჯდომარეობით სამშვიდობო საბჭო გააკონტროლებს.
მას შემდეგ, რაც რუსეთი, უკრაინის მსგავსად, დათანხმდება ცეცხლის შეწყვეტას და ორივე მხარე ტერიტორიული წინსვლის შეჩერებაზე აიღებს ვალდებულებას, 12-პუნქტიანი წინადადება ითვალისწინებს ყველა დეპორტირებული ბავშვის უკრაინაში დაბრუნებას და ტყვეების გაცვლას.
უკრაინა მიიღებს უსაფრთხოების გარანტიებს, ომის შედეგად მიყენებული ზიანის აღსადგენად სახსრებს და ევროკავშირში სწრაფი გაწევრიანების გზას.
რუსეთის წინააღმდეგ სანქციები თანდათან მოიხსნება, თუმცა ცენტრალური ბანკის გაყინული რეზერვების დაახლოებით 300 მილიარდი დოლარი მხოლოდ მაშინ გათავისუფლდება, როდესაც მოსკოვი დათანხმდება წვლილი შეიტანოს უკრაინის ომისშემდგომ აღდგენაში.
შეზღუდვები აღდგება, თუ რუსეთი უკრაინას კვლავ დაესხმება თავს.
წყაროების ცნობით, მოსკოვი და კიევი ოკუპირებული ტერიტორიების მმართველობაზე მოლაპარაკებებს დაიწყებენ, თუმცა არც ევროპა და არც უკრაინა იურიდიულად არცერთ ოკუპირებულ ტერიტორიას რუსეთის საკუთრებად არ აღიარებენ.
გამოცემის ცნობით, გეგმის დეტალები ჯერ კიდევ დაზუსტების პროცესშია და შეიძლება მისი პუნქტები შეიცვალოს. ასევე წინადადება ვაშინგტონის მხარდაჭერას მოითხოვს და შესაძლოა, ევროპელი ოფიციალური პირები მიმდინარე კვირაში აშშ-ს ეწვიონ.
როგორც მედია იუწყება, 12-პუნქტიანი გეგმა აშშ-ის პრეზიდენტ დონალდ ტრამპის მოწოდებებს იმეორებს, თუმცა რუსეთი ომის უკვე არსებულ ფრონტის ხაზზე გაჩერებასა და კონფლიქტის არსებული ხაზებით გაყინვას ამ დრომდე არ თანხმდება.
