ვოლოდიმირ ზელენსკი და ევროპელი ლიდერები ერთობლივ განცხადებას ავრცელებენ.
"მტკიცედ ვუჭერთ მხარს პრეზიდენტ ტრამპის პოზიციას, რომ უკრაინაში ბრძოლა დაუყოვნებლივ უნდა შეწყდეს", - აღნიშნულია განცახდებაში.
განცხადების თანახმად, რუსეთზე უნდა გაძლიერდეს ზეწოლა იქამდე, ვიდრე ვლადიმირ პუტინი მშვიდობისთვის მზაობას გამოხატავს.
„მტკიცედ ვუჭერთ მხარს პრეზიდენტ ტრამპის პოზიციას, რომ ბრძოლა დაუყოვნებლივ უნდა შეწყდეს და კონტაქტის არსებული ხაზი უნდა გახდეს მოლაპარაკებების დაწყების წერტილი. ჩვენ ერთიანი ვართ სამართლიანი და ხანგრძლივი მშვიდობისკენ სწრაფვაში, რომელსაც უკრაინელი ხალხი იმსახურებს. ვრჩებით ერთგული პრინციპისა, რომ საერთაშორისო საზღვრები, არ შეიძლება, ძალისმიერი გზით შეიცვალოს.
რუსეთის გაჭიანურების ტაქტიკა ყოველ ჯერზე აჩვენებს, რომ უკრაინა არის ერთადერთი მხარე, რომელიც სერიოზულად არის განწყობილი მშვიდობისთვის. ყველა ვხედავთ, რომ პუტინი განაგრძობს ძალადობისა და დესტრუქციის არჩევას. ამიტომ ჩვენ მკაფიოდ გვესმის, რომ უკრაინას მაქსიმალურად ძლიერი პოზიცია უნდა ჰქონდეს ცეცხლის შეწყვეტამდე, მის დროს და შემდეგაც. ჩვენ უნდა გავაძლიეროთ ზეწოლა რუსეთის ეკონომიკასა და მის თავდაცვის ინდუსტრიაზე, ვიდრე პუტინი მზად იქნება მშვიდობისთვის. ჩვენ ვამუშავებთ ზომებს, რათა სრული მოცულობით გამოვიყენოთ რუსეთის გაყინული სუვერენული აქტივები, რომ უკრაინამ მიიღოს აუცილებელი რესურსები“, – ნათქვამია განცხადებაში.
განცხადებას ხელს აწერენ უკრაინის პრეზიდენტი ვოლოდიმირ ზელენსკი, დიდი ბრიტანეთის პრემიერ-მინისტრი კირ სტარმერი, გერმანიის კანცლერი ფრიდრიხ მერცი, საფრანგეთის პრეზიდენტი ემანუელ მაკრონი, იტალიის პრემიერ-მინისტრი ჯორჯია მელონი, პოლონეთის პრემიერ-მინისტრი დონალდ ტუსკი, ევროკომისიის პრეზიდენტი ურსულა ფონ დერ ლაიენი, ევროპული საბჭოს პრეზიდენტი ანტონიო კოშტა, ნორვეგიის პრემიერ-მინისტრი იონას გარ სტორე, ფინეთის პრეზიდენტი ალექსანდრ სტუბი და დანიის პრემიერ-მინისტრი მეტე ფრედერიქსენი.
