საფრანგეთის კულტურის მინისტრის რაშიდა დატის განცხადებით, ლუვრიდან მოპარული ერთ-ერთი საიუველირო ნივთი ძარცვის ადგილის მახლობლად იპოვეს.  დატის განმარტებით, ნივთი, სავარაუდოდ ის მძარცველებს დაუვარდათ.

„ძარცვის შესახებ ინფორმაციის მიღებიდან რამდენიმე წუთში მივედით ადგილზე. ეს ოპერაცია თითქმის ოთხ წუთს გაგრძელდა. უნდა ვთქვათ, რომ ისინი პროფესიონალები არიან. ორგანიზებული დანაშაული დღეს ხელოვნების ნიმუშებს ესხმის თავს და, რა თქმა უნდა, მუზეუმებიც იქცნენ სამიზნედ, რადგან საფრანგეთი არის ქვეყანა, რომელსაც ღირებული ისტორიული ობიექტები აქვს. მოპარულია ფასდაუდებელი სამკაულები. გაქცევის დროს დაუვარდათ ძვირფასი ქვა, რომელიც ლუვრის მუზეუმთან აღმოვაჩინეთ. ახლა მისი შეფასება ხდება. გამოძიება მიმდინარეობს“, – განუცხადა მედიას კულტურის მინისტრმა.

მანამდე, მუზეუმმა განაცხადა, რომ ის დღის განმავლობაში "გამონაკლისი მიზეზების" გამო იხურებოდა, თუმცა დეტალები არ დაუზუსტებია.

როგორც BBC წერს, სამმა ნიღბიანმა შესასვლელად გამოიყენა სარემონტო ლიფტი აპოლონის გალერეაში, სადაც საფრანგეთის სამეფო ძვირფასეულობა ინახება. გამოცემის მიხედვით, მძარცველები ბენზოხერხებით იყვნენ შეიარაღებულები. მათ მუზეუმში შესასვლელად ფანჯრები ჩაამსხვრიეს, რის შემდეგაც სკუტერებით გაიქცნენ. მოპარული ნივთების ღირებულება ჯერჯერობით უცნობია.

ლუვრში მრავალი ცნობილი ხელოვნების ნიმუში და სხვა ძვირფასი ნივთი ინახება.