დღეს ბრიუსელში ვხედავთ ხალხს, რომელიც საბჭოთა პერიოდში იყო პოლიტიკური ელიტა, - განაცხადა გადაცემაში „იმედი LIVE“ საქართველოს საგარეო საქმეთა მინისტრმა მაკა ბოჭორიშვილმა ევროკავშირის პოლიტიკის ფორმირების თემაზე საუბრისას.
„2004 წელს, როცა ევროკავშირის დიდი გაფართოება მოხდა, ძალიან კარგად მახსოვს, იყო მსჯელობა, ეს ქვეყნები - პოსტსაბჭოთა, სოციალისტური ბანაკიდან, რამდენად იყვნენ მზად იმისთვის, რომ გამხდარიყვნენ ევროკავშირის წევრები. განსაკუთრებით საფრანგეთში იყო პოპულარული ასეთი დისკუსიები.
მერე ხშირად გვესმოდა, „თქვენ არ ხართ ჯერ მზად იმისთვის, რომ ევროკავშირში გაწევრიანებაზე ვისაუბროთ“ - მოხდა ეს დიდი გაფართოება, ეს არ იყო მაინც და მაინც ორგანული შერწყმა, კი მოხდა გაერთიანება და კარგია, მაგრამ რაღაც პრობლემები სადღაც ჩანდა”, - განაცხადა მაკა ბოჭორიშვილმა.
მან აღნიშნა, რომ პრობლემა არის, რომ არ მომხდარა თაობის ცვლა.
„რა არის ეს პრობლემები? ეს პრობლემები არის ის, რომ თაობის ცვლა არ მომხდარა რეალურად. ჩვენ დღეს ბრიუსელში ვხედავთ იმ ხალხს, რომელიც კომუნისტური და საბჭოთა პერიოდის დროს იყო პოლიტიკური ელიტა. დღეს ისინი დაბინავებული არიან ბრიუსელში ევროკავშირის სტრუქტურებში და იგივე მეთოდებით, რომლებითაც შეიძლება, საბჭოთა კავშირის დროს პოლიტიკას აკეთებდნენ, ცდილობენ, ევროკავშირშიო აკეთონ პოლიტიკა.
ეს რა თქმა უნდა, ჩვენც გვაწუხებს, მაგრამ ევროპას ნამდვილად უნდა აწუხებდეს. რა არის ის ფასეულობები, რასაც ასე ხშირად გვახსენებენ ხოლმე და რას ემსგავსება ეს ფასეულობები და პრინციპები, რაზედაც დგას ის ძირძველი ევროპა, რომელიც ჩვენც გვჭირდება, მასაც ვჭირდებით და და გვინდა, რომ ორგანულად ვიყოთ ერთი ნაწილი”, - განაცხადა საგარეო საქმეთა მინისტრმა.
