მედიის ცნობით,ესტონეთის სასაზღვრო დაცვამ სააცეს სასაზღვრო გამშვები პუნქტის დახურვის გადაწყვეტილება მიიღო მას შემდეგ, რაც სასაზღვრო დაცვის წარმომადგენლებმა რუსეთის ტერიტორიაზე ჩვეულებრივზე დიდი სამხედრო დანაყოფი შენიშნეს.
სამხრეთ პრეფექტურის ოპერაციების დირექტორის, კუნტერ პედოსკის თქმით, პარასკევს, 10 ოქტომბერს, მესაზღვრეებმა ტერიტორიაზე ჩვეულებრივზე უფრო დიდი რუსული წარმომადგენლობა შენიშნეს.
„რუსი მესაზღვრეები რეგულარულად პატრულირებენ სააცეს სასაზღვრო გამშვებ პუნქტზე, რადგან ეს მათი ტერიტორიაა. დღეს ჩვეულებრივზე მეტი მოძრაობა იყო. ჩვენ გადავწყვიტეთ გზის ჩაკეტვა შესაძლო პროვოკაციებისა და ინციდენტების თავიდან ასაცილებლად, რადგან ჩვენი მიზანია ესტონელი ხალხის უსაფრთხოების უზრუნველყოფა“, - განმარტა პედოსკიმ.
მან აღნიშნა, რომ სასაზღვრო დაცვის წარმომადგენლებმა თავდაპირველად გზის ორივე მხარეს პატრულის განალაგეს, რომლებიც გამვლელ მძღოლებს ურჩევდნენ, ატერიტორიაზე შესვლისგან თავი აერიდებინათ რუსული დანაყოფების გაზრდილი ყოფნის გამო.
„ამ რეკომენდაციის მიუხედავად, იყვნენ ისეთებიც, ვისაც მაინც სურდა ამ ტერიტორიაზე მოგზაურობის გაგრძელება. რადგან გზა რუსეთის ტერიტორიაზე გადის, უსაფრთხოების სიტუაციის გათვალისწინებით, სააცეს სასაზღვრო გამშვები პუნქტის გადაკვეთისას სიფრთხილე აუცილებელია“, - აღნიშნა მან.
ცნობისათვის, რომ 19 სექტემბრის დილით, MiG-31ტიპის სამი რუსული გამანადგურებელი ესტონეთის საჰაერო სივრცეში, ვაინდლოოს კუნძულთან ახლოს შეიჭრა და იქ დაახლოებით 12 წუთის განმავლობაში დარჩა.
მათ ჩასაჭრელად ფინური და შვედური გამანადგურებლები აფრინდნენ.
მედიაში გავრცელებული ინფორმაციით, ევროპელმა დიპლომატებმა პირადად გააფრთხილეს კრემლი, რომ ნატო მზადაა უპასუხოს რუსული თვითმფრინავების მიერ მისი საჰაერო სივრცის შემდგომ დარღვევებს, მათ შორის მათი ჩამოგდებით.
