მე ხვალ არ წავალ არჩევნებზე და ჩემს ხალხთან ერთად ვიქნები ხვალინდელ მშვიდობიან აქციაზე და სანამ საჭირო იქნება ყველა აქციაზე ვიქნები“, - ამის შესახებ საქართველოს მეხუთე პრეზიდენტმა სალომე ზურაბიშვილმა ბრიფინგზე განაცხადა.
ზურაბიშვილის თქმით, არჩევნები, რომლის ჩატარებაც ხვალ იეგგემაბა, რეალურად, "ფარსია".
"მინდა, პირველ რიგში, ვუპასუხო, შევეხმიანო ირაკლი კობახიძეს, რომელმაც დღეს აქო ვითომდა სამართლიანია, არაჩვეულებრივი ადგილობრივი არჩევნები, რაც ხვალ ჩატარდება და ამავე დროს დაგვემუქრა, რომ რაღაცის დამხობა იგეგმება. ეს არის ტყუილი, ორივე მხრივ ტყუილია. არანაირი სამართლიანი, თავისუფალი ადგილობრივი არჩევნები არ ჩატარდება ხვალ. ეს იქნება ჩვეულებრივი ფარსი და დაცინვა საზოგადოების, რომელიც მშვიდობიანად გამოდის ქუჩაში უკვე 300 დღეზე მეტია. ეს ხალხი, ვინ გამოდის, რომ მიიღოს უკან თავისი ხმა და დაიბრუნოს არჩევნები, ის ვერ დაკმაყოფილდება იმ ფარსით, რომელიც ხვალ ჩატარდება. არაფრის გამოგლეჯვის შანსი, არც არაფრის გამოსწორების შანსი არ არსებობს. ეს არის ჩვეულებრივი, დიქტატურის პირობებში ჩატარებული არჩევნები. ცოტა ხნის წინ ჩვენ ვნახეთ ამის მაგალითი რუსეთშიც.
მეორე, და შეიძლება, კიდევ უფრო დიდი ტყუილი იყოს ის, რასაც წინასწარმეტყველებს კობახიძე, რომ რაღაც მცდელობა იქნება დამხობის, სადაც ყველა იქნება გაერთიანებული. ესეც არის ფარსი და ესეც არის შეურაცხყოფა იმ საზოგადოების, რომელმაც მსოფლიოს აჩვენა ამ დღეების მანძილზე, ამ ერთი წლის მანძილზე, თავისი მედგრობა, თავისი გამძლეობა და თავისი უაღრესი მშვიდობიანი გამოსვლა. არცერთ დღეს არ ყოფილა ძალადობა, არ ყოფილა არანაირი მცდელობა, 200 ათასი კაცი ხომ გამოდიოდა დასაწყისში მაინც და ხვალაც შეიძლება, ძალიან ბევრი გამოვიდეს, აჩვენა მსოფლიოს, რომ თურმე შეიძლება, უაღრესად მშვიდობიანად გამოხატვა საკუთარი წინააღმდეგობის. ასე რომ, არ შეიძლება, ეს ყველაფერი ვითომდა მოდელირებული დამხობით დაამთავრო. ეს არის მცდელობა, იმის მერე, რაც რეჟიმმა დისკრედიტაცია მოახდინა რამდენიმე პარტიის ამ არჩევნებით, მცდელობა, რომ დანარჩენი პარტიების დისკრედიტაციაც მოახდინოს ვითომ ამ რაღაც რადიკალიზაციის დიდ გაერთიანებაში და რაც მთავარია, ამით ჩააქროს ის დიდი მშვიდობიანი პროტესტი, რომელიც დღემდე მოდის და ხვალაც გაგრძელდება. ეს არის მთავარი ძალა და ის ძალა, რომელსაც ვერ მოერია ეს რეჟიმი.
არანაირი მესამე რესპუბლიკა, ჯერ ერთი, მეორე რესპუბლიკაც არ არის. ჩვენ აღვადგინეთ დამოუკიდებლობა 91-ში და აღვადგინეთ იმ პირველი რესპუბლიკის კონსტიტუციის საფუძველზე. ამიტომ ეს ყველაფერიც არის ფარსი. ჩვენ არ უნდა გადაგვიყვანონ ამ რეჟიმში, ყველანი ვიყოთ ძალიან მშვიდად. მე არ წავალ ხვალ არჩევნებზე და მე ჩემს ხალხთან ერთად ვიქნები ხვალინდელ მშვიდობიან აქციაზე, როგორც ვიყავი ყველა მნიშვნელოვან მთავარ აქციაზე და კიდევ ვიქნები, სანამ საჭირო იქნება და ბოლომდე!, - განაცხადა სალომე ზურაბიშვილმა.
