დიდი ბრიტანეთის მეფე ჩარლზ III-მ აშშ-ის პრეზიდენტ დონალდ ტრამპის ვიზიტთან დაკავშირებით გამართულ ბანკეტზე უკრაინას მხარდაჭერა კიდევ ერთხელ გამოუცხადა. ამის შესახებ CNN იუწყება.
„ორ მსოფლიო ომში ჩვენ ერთად ვიბრძოდით ტირანიის ძალების დასამარცხებლად. დღეს, როდესაც ტირანია კვლავ ემუქრება ევროპას, ჩვენ და ჩვენი მოკავშირეები ერთად ვდგავართ უკრაინის მხარდასაჭერად, რათა შევაჩეროთ აგრესია და უზრუნველვყოთ მშვიდობა. ჩვენი ქვეყნები ერთად მუშაობენ მნიშვნელოვანი დიპლომატიური ძალისხმევის მხარდასაჭერად, რომელთაგანაც არანაკლებ მნიშვნელოვანია, ბატონო პრეზიდენტო, თქვენი პირადი ერთგულება, იპოვოთ გადაწყვეტილებები მსოფლიოს ყველაზე რთული კონფლიქტების გადაჭრისა და მშვიდობის უზრუნველსაყოფად“, – აღნიშნა მეფე ჩარლზმა.
ტრამპმა თავის გამოსვლაში დიდ ბრიტანეთში მეორე სახელმწიფო ვიზიტს „ცხოვრების ერთ-ერთი უდიდესი პატივი“ უწოდა.
აშშ-ის პრეზიდენტმა ასევე ხაზი გაუსვა აშშ-სა და გაერთიანებულ სამეფოს შორის არსებულ კავშირებს და თქვა, რომ მათ „განსაკუთრებული ურთიერთობა“ აქვთ.
მან ასევე აღნიშნა, რომ შეერთებულმა შტატებმა „წარმოუდგენელ წარმატებას მიაღწია“.
„სულ რაღაც ერთი წლის წინ ჩვენი ქვეყანა ძალიან ავად იყო, მაგრამ დღეს, ჩემი აზრით, ჩვენ მსოფლიოში ყველაზე წარმატებული ქვეყანა ვართ.
ამაში ეჭვი არავის ეპარება, მაგრამ გარკვეულწილად ეს თქვენი და იმ საფუძვლის დამსახურებაა, რომელიც თავიდანვე ჩაუყარეთ, როდესაც ერთად მივაღწიეთ წარმატებას“, - თქვა ტრამპმა.
