უახლოეს მომავალში ყადაღადადებული ქონების აღწერა-შეფასებას შემოსავლების სამსახურის ნაცვლად აღსრულების ეროვნული ბიურო განახორციელებს.
მთავრობამ შესაბამისი კანონპროექტი პარლამენტში განსახილველად უკვე შეიტანა, რომლის მიხედვითაც შემოსავლების სამსახურის ფუნქციები, აღსრულების ეროვნული ბიუროსა და საჯარო რეესტრის ეროვნული სააგენტოს გაძლიერების ხარჯზე, იზღუდება.
ფინანსთა მინისტრის მოადგილის ნათია მიქელაძის განმარტებით, კანონპროექტის მიზანია, გადასახადის გადამხდელის ქონებაზე ყადაღის დადების პროცედურების ეფექტურად განხორციელება, გადასახადის გადამხდელთა მომსახურების ცალკეული სახეების შემჭიდროებულ ვადებში წარმართვა და მომსახურების ხარისხის გაუმჯობესება.
მთავრობის საკანონმდებლო ინიციატივის თანახმად, შემოსავლების სამსახურსა და
აღსრულების ეროვნულ ბიუროს შორის გაფორმდება ხელშეკრულება.
ხელშეკრულების საფუძველზე ბიუროს შესაძლებლობა მიეცემა, საგადასახადო დავალიანების გადახდევინების უზრუნველყოფის მიზნით, პირის ქონების აღწერა, შეფასება, ყადაღის აქტის შედგენა, შენახვა, დალუქვა, მალფუჭებადი ყადაღადადებული ქონების რეალიზაცია, აგრეთვე გადასახადის გადამხდელისგან ქონების ნუსხის თაობაზე ინფორმაციის გამოთხოვა და ქონებაზე ყადაღის რეგისტრაციის მოთხოვნით მარეგულირებელი ორგანოსთვის მიმართვა განახორციელოს.
მთავრობის ახალი საკანონმდებლო ინიციატივის თანახმად, საგადასახადო ორგანოს კომპეტენციას მიკუთვნებული გადასახადის გადამხდელთა მომსახურეობის ცალკეული სახეებს საჯარო რეესტრის ეროვნული სააგენტო განახორციელებს.