სახელმწიფოს წილობრივი მონაწილეობით მოქმედი საწარმოების წმინდა მოგების გადანაწილებისა და გამოყენების განხილვა მთავრობის მიერ შექმნილ კომისიას დაევალება. აღნიშნულთან დაკავშირებით ცვლილება შედის "საქართველოს საბიუჯეტო კოდექსში".
კანონპროექტის თანახმად, სახელმწიფოს წილობრივი მონაწილეობით მოქმედი საწარმოების წმინდა მოგების განაწილებისა და გამოყენების შესახებ წინადადებებს განიხილავს და გადაწყვეტილებას იღებს კომისია, რომლის შემადგენლობა და საქმიანობის წესი საქართველოს მთავრობის დადგენილებით განისაზღვრება.
ამასთან, კომისიას აქვს უფლება სახელმწიფოს წილობრივი მონაწილეობით მოქმედი საწარმოების წმინდა მოგებიდან საწარმოსთვის დატოვებული თანხის გახარჯვის მიზნობრიობის თაობაზე გადაწყვეტილება მიიღოს.
კოდექსის გარდამავალ დებულებას ემატება მუხლი, რომლის მიხედვითაც, საქართველოს მთავრობამ 2011 წლის 15 მარტამდე სახელმწიფოს წილობრივი მონაწილეობით მოქმედი საწარმოების წმინდა მოგების განაწილებისა და გამოყენების შესახებ წინადადებების განხილვისა და გადაწყვეტილების მიმღები კომისიის შემადგენლობის და საქმიანობის წესის მიღება უნდა უზრუნველყოს.
როგორც ცნობილია, დღემდე სახელმწიფოს წილობრივი მონაწილეობით მოქმედი საწარმოების წმინდა მოგების განაწილებისა და გამოყენების შესახებ წინადადებებს განიხილავს და გადაწყვეტილებას იღებს საქართველოს ფინანსთა და ეკონომიკის და მდგრადი განვითარების მინისტრების მიერ ერთობლივი ბრძანებით შექმნილი კომისია.
