მთავრობა ფასიანი ქაღალდების ბაზრის განვითარებას ცდილობს და "ფასიანი ქაღალდების ბაზრის შესახებ" კანონში ცვლილებები შეაქვს.
როგორც დარგობრივი ეკონომიკისა და ეკონომიკური პოლიტიკის საპარლამენტო კომიტეტის სხდომაზე პრემიერ-მინისტრის მთავარმა მრჩეველმა ვახტანგ ლეჟავამ აღნიშნა, კანონპროექტის მიღების მიზანს წარმოადგენს საწარმოს პარტნიორების ინტერესთა დაცვის მექანიზმების გაძლიერების გზით, "ფასიანი ქაღალდების ბაზრის შესახებ" კანონის სრულყოფა.
კანონპროექტის თანახმად, ანგარიშვალდებული საწარმოს მმართველი ორგანოს წევრი ვალდებულია დასადებ გარიგებაში ინტერესთა კონფლიქტის არსებობის შესახებ შეტყობისთანავე განაცხადოს; ასევე, გარიგება, რომელშიც მონაწილეობენ დაინტერესებული პირები და რომლის ღირებულება შეადგენს ანგარიშვალდებული საწარმოს აქტივების ღირებულების 10%-ს, ან მეტს ან/და წესდებით გათვალისწინებულ უფრო მცირე ოდენობას, საერთო კრებამ უნდა დაამტკიცოს.
ანგარიშვალდებული საწარმოს მმართველი ორგანოს წევრებმა, რომლებმაც იცოდნენ, ან უნდო სცოდნოდათ და არ განაცხადეს გარიგებაში ინტერესთა კონფლიქტის შესახებ ან/და მხარი დაუჭირეს ასეთ გარიგების დადებას, რამაც საზოგადოებისათვის ზიანი გამოიწვია, დაინტერესებულ პირთან ერთად სოლიდარულად უნდა აანაზღაურონ საზოგადოებისთვის ამ გარიგების შედეგად მიყენებული ზიანი და დააბრუნონ გარიგების დადებით მიღებული პირადი სარგებელი, თუ დამტკიცდება, რომ ინტერესთა კონფლიქტის მიზეზით გარიგების შედეგად საზოგადოებას მიადგა ზიანი და დაინტერესების არარსებობისას გარიგება უკეთესი პირობებით დაიდებოდა.
საწარმოს პარტნიორებს უფლება ექნებათ მოითხოვონ საწარმოს ხელმძღვანელების მიერ, არასამართლიანი ან ინტერესთა კონფლიქტის წესების დარღვევით დადებული ხელშეკრულების ბათილად ცნობა, ხელშეკრულების დადებიდან 18 თვის განმავლობაში.
პარტნიორებს უფლება აქვთ, მოითხოვონ ზიანის ანაზღაურება მიუხედავად იმისა შეუძლიათ თუ არა მათ ხელშეკრულების ბათილობის მოთხოვნა.
კანონპროექტის ავტორი საქართველოს მთავრობაა.