ისრაელის თავდაცვის ძალებმა, უსაფრთხოების სამსახურთან ერთად, ღაზის სექტორიდან დააბრუნეს კიდევ ორი მძევლის ცხედარი, რომლებიც ჰამასის ტერორისტებმა 2023 წლის 7 ოქტომბერს თავდასხმის დროს გაიტაცეს.
როგორც ისრაელის თავდაცვის ძალების პრესსპიკერის ოფისის მიერ შაბათს, 30 აგვისტოს საღამოს გახდა ცნობილი, ილან ვაისის ცხედართან ერთად, რომლის აღმოჩენის შესახებაც წინა დღეს იუწყებოდნენ, ისრაელში ღაზის სექტორიდან იდან შტივის ნეშტიც გადაასვენეს.
ინფორმაციაში ნათქვამია, რომ შტივი 7 ოქტომბერს ნოვას მუსიკალურ ფესტივალზე მოკლეს, როდესაც სხვა თავდამსხმელების გადარჩენას ცდილობდა, რის შემდეგაც მისი ცხედარი ღაზის სექტორში გადაიტანეს. გარდაცვალების დროს ის 28 წლის იყო.
პარასკევს, 29 აგვისტოს, ისრაელის თავდაცვის ძალებმა განაცხადა 55 წლის ილან ვაისის ნეშტის ისრაელში დაბრუნების შესახებ. ისიც 2023 წლის 7 ოქტომბერს, ბეერის კიბუცში მოკლეს. ვაისი სწრაფი რეაგირების ჯგუფის წევრი იყო და იცავდა დასახლებას, როდესაც ჰამასი კიბუცს თავს დაესხა. მისი მეუღლე შირი და ქალიშვილი ნოგა ერთდროულად აიყვანეს მძევლად; ისინი 2023 წლის ნოემბერში გაათავისუფლეს.
ღაზაში ორი მძევლის გარდაცვალების დადასტურების შემდეგ, ჰამასის ტყვეობაში 48 ისრაელელი რჩება. ბოლო მონაცემებით, მათგან, 20 ცოცხალია, დანარჩენები კი დაღუპულები არიან.
„ჩვენ გავაგრძელებთ დაუნდობელი და გადამწყვეტი ქმედებების განხორციელებას სხვადასხვა გზით, რათა დავაბრუნოთ ჩვენი ყველა მძევალი, ცოცხალიც და გარდაცვლილიც“, - ნათქვამია ისრაელის პრემიერ-მინისტრის, ბენიამინ ნეთანიაჰუს ადმინისტრაციის განცხადებაში მძევლების ცხედრების დაბრუნების შესახებ.
