უკრაინული მედიის ცნობით, 30 აგვისტოს, უკრაინის საგარეო საქმეთა მინისტრი ანდრიი სიბიჰა დისტანციურად შეუერთდა ევროკავშირის საგარეო საქმეთა მინისტრების არაფორმალურ შეხვედრას, რომელიც კოპენჰაგენში გაიმართა.
მან პარტნიორებს უკრაინის ქალაქების წინააღმდეგ რუსული საჰაერო ტერორიზმის გაძლიერების შესახებ ესაუბრა და პარტნიორებს რეაგირებისა და მხარდაჭერისთვის მადლობა გადაუხადა.
სიბიჰამ ხაზგასმით აღნიშნა, რომ რუსეთის მიერ კიევში ევროკავშირის მისიასა და ზაკარპატიეში ამერიკულ ქარხანაზე ბოლოდროინდელი დარტყმები იმის სიგნალია, რომ პუტინი ომის დასრულებას არ აპირებს და აუცილებელია ამისთვის მისი იძულება.
ანდრიი სიბიჰამ პარტნიორებს რუსეთის შემდგომი აგრესიული გეგმების შესახებ მიაწოდა ინფორმაცია და ხაზი გაუსვა, რომ მოსკოვს ჯერ კიდევ არ გამოუხატავს რაიმე მზაობა რეალური სამშვიდობო პროცესისთვის და აგრძელებს ულტიმატუმების წაყენებას.
„რუსეთი მთელი ევროპისა და ტრანსატლანტიკური სივრცისთვის ეგზისტენციალურ საფრთხედ რჩება... რუსეთთან და სამშვიდობო პროცესთან დაკავშირებული სტრატეგიები რეალისტური უნდა იყოს და არ უნდა ეფუძნებოდეს ცრუ ვარაუდებს“, - აღნიშნა სიბიჰამ.
მინისტრმა ასევე მადლობა გადაუხადა ევროპის ქვეყნებს სანქციების მე-19 პაკეტის მომზადებისთვის და აღნიშნა აშშ-ის სასანქციო ნაბიჯების მნიშვნელობა. მან ხაზგასმით აღნიშნა, რომ მოსკოვზე ზეწოლა ეფექტური იქნება მაშინ, როდესაც ის დროული და კარგად კოორდინირებული იქნება.
საგარეო საქმეთა მინისტრმა ასევე მოუწოდა ევროკავშირის წევრ სახელმწიფოებს, გაზარდონ უკრაინისთვის თავდაცვის მხარდაჭერა და ინვესტიციები უკრაინის თავდაცვის ინდუსტრიაში, კერძოდ, დრონების წარმოებაში, გადადგან გადამწყვეტი ნაბიჯები რუსეთის ჩამორთმეული აქტივების უკრაინის თავდაცვისა და აღდგენის მიზნით გამოსაყენებლად.
„პუტინმა უნდა გააცნობიეროს, რომ ამ ომის გაგრძელება საფრთხეს უქმნის როგორც მის რეჟიმს, ასევე პირადად მას. ან ახლავე შეჩერდება, ან სერიოზული შედეგების წინაშე აღმოჩნდება. ეს არის მშვიდობის სტრატეგია ძალის მეშვეობით“, - აღნიშნა მინისტრმა.
