ჩვენ უკვე ვართ რუსეთთან კონფლიქტის მდგომარეობაში,- ამის შესახებ გერმანიის კანცლერმა ფრიდრიხ მერცმა ფრანგულ ტელერახ LCI-თან ინტერვიუში განაცხადა.
მერცმა აღნიშნა, რომ რუსეთის ლიდერი ვლადიმირ პუტინი ყოველდღიურად ესხმის თავს გერმანიის ინფრასტრუქტურას და ცდილობს „გავლენა მოახდინოს საზოგადოებრივ აზრზე“, მათ შორის სოციალური მედიის საშუალებით.
„პუტინი ჩვენი ქვეყნის დიდი ნაწილის დესტაბილიზაციას ახდენს. ის ყველგან ერევა“, - აღნიშნა კანცლერმა.
მისი თქმით, პუტინი ნატო-სგან საფრთხეს არ გრძნობს და ამიტომ თავს ესხმის დემოკრატიებს. მერცმა აღნიშნა, რომ რუსული აგრესია ტერიტორიულ პრეტენზიებს სცდება.
„პუტინი აღარ სცემს პატივს არცერთ საერთაშორისო შეთანხმებას. ამ ახალ პერიოდში, ამ ახალ სამყაროში, ჩვენ წინაშე ვდგავართ სახელმწიფოს მეთაურები, რომლებიც აღარ არიან მზად მიიღონ საერთაშორისო სამართლის ზოგადი წესები. ეს მხოლოდ პუტინს არ ეხება. იგივე ეხება სი ძინპინს ჩინეთში. იგივე ეხება ჩრდილოეთ კორეას,“ - განაცხადა მერცმა.
ჟურნალისტის შეკითხვაზე, ჰქონდა თუ არა კანცლერს პუტინის ტელეფონის ნომერი, მერცმა უპასუხა, რომ დიპლომატია პუტინს მხოლოდ მშვიდობიანი მოსახლეობის წინააღმდეგ უფრო დიდი აგრესიისკენ უბიძგებს.
„პუტინთან ნებისმიერ დროს შემეძლო დარეკვა. სინამდვილეში, ასეც მოვიქცეოდი, თუ იმედი მქონდა, რომ ასეთი ზარით სიტუაციას სწორი მიმართულებით შევცვლიდი.
მაგრამ დღეს, ჩვენს მიერ განხორციელებულმა ყველა დიპლომატიურმა ძალისხმევამ მხოლოდ მეტი აგრესია გამოიწვია მშვიდობიანი მოსახლეობის წინააღმდეგ. სწორედ ამიტომ ვსაუბრობთ ნაკლებად“, - განაცხადა მერცმა.
გერმანიის მთავრობის მეთაურის თქმით, მსოფლიო იძულებული იქნება პუტინის რუსეთს კიდევ მრავალი წლის განმავლობაში ებრძოლოს.
„ყველას იმედი გვაქვს, რომ ერთ დღეს რუსებთან კვლავ კარგი მეზობლები ვიქნებით.
სამწუხაროდ, დღეს ჩვენ ძალიან, ძალიან შორს ვართ ამისგან. მე ვიტყოდი, რომ ჩვენ უნდა ვუთხრათ „არა“ პუტინის რეჟიმს და ყველაფერს, რაც მის ნაწილს წარმოადგენს, ოლიგარქებს, ამ კლეპტოკრატიას, რომელმაც სახელმწიფო დაიპყრო. და ვიბრძოლოთ მის წინააღმდეგ. ვფიქრობ, ჩვენ ამ ავტორიტარული რეჟიმის წინაშე კიდევ მრავალი წლის განმავლობაში ვიქნებით,“ - თქვა მერცმა.
ჟურნალისტის შეკითხვაზე ეთანხმება, თუ არა საფრანგეთის ლიდერის, ემანუელ მაკრონის სიტყვებს, როდესაც მან რუსეთის პრეზიდენტს ევროპის კართან კაციჭამია უწოდა, მერცმა უპასუხა: „ასე ვხედავ ვლადიმირ პუტინს“.
