21 აგვისტოს საღამოდან, რუსმა ოკუპანტებმა უკრაინას 55 „შაჰედის“ ტიპის უპილოტო საფრენი აპარატით და სხვადასხვა ტიპის დრონებით შეუტიეს; 46 დრონი განეიტრალდა, თუმცა იყო დარტყმებიც. ინფორმაციას უკრაინის საჰაერო ძალები ავრცელებს.
„9:00 საათის მონაცემებით, საჰაერო თავდაცვის ძალებმა ქვეყნის ჩრდილოეთით და აღმოსავლეთით ჩამოაგდეს/ჩაახშეს მტრის 46 Shahed-ის ტიპის უპილოტო საფრენი აპარატი და სხვადასხვა ტიპის დრონები. 4 ლოკაციაზე დაფიქსირდა 9 თავდასხმის უპილოტო საფრენი აპარატის დარტყმა,“ - აღნიშნულია ინფორმაციაში.
ოკუპანტებმა დრონები გაუშვეს რუსეთის ქალაქების - შატალოვოს, კურსკის, მილეროვოს და პრიმორსკო-ახტარის მიმართულებებიდან, ასევე გვარდეისკოედან, რომელიც დროებით ოკუპირებულ ყირიმში მდებარეობს.
საჰაერო თავდასხმა მოიგერიეს უკრაინის თავდაცვის ძალების საზენიტო-სარაკეტო ძალებმა, ელექტრონული საბრძოლო დანაყოფებმა, უპილოტო სისტემებმა და მობილურმა საცეცხლე ჯგუფებმა.
