უნგრეთსა და სლოვაკეთში მილსადენ Druzhba-ს მეშვეობით ნავთობის მიწოდება აღდგა
ნავთობის მიწოდება უნგრეთსა და სლოვაკეთში მილსადენ Druzhba-ს მეშვეობით სამშაბათს საღამოს აღდგა. ამის შესახებ ორივე ქვეყნის ოფიციალურმა პირებმა განაცხადეს.
მიწოდება მას შემდეგ შეჩერდა, რაც რუსეთის ტამბოვის ოლქში ნავთობსატუმბ სადგურზე უკრაინის დრონის თავდასხმა განხორციელდა.
„სლოვაკეთში ნავთობის მიწოდება ამჟამად სტანდარტული რეჟიმით ხორციელდება“, - ციტირებს Reuters სლოვაკეთის ეკონომიკის მინისტრის სიტყვებს.
„მიმდინარე თვის მიწოდების გრაფიკში შესაძლო ცვლილებების შესახებ უფრო მკაფიო ინფორმაცია უახლოეს დღეებში გვექნება. თუმცა, მილსადენის სწრაფი აღდგენის გათვალისწინებით, მე მჯერა, რომ ეფექტი მინიმალური იქნება“, - განაცხადა მან.
ინფორმაცია უნგრეთისთვის მილსადენ Druzhba-ს მეშვეობით მიწოდების აღდგენის შესახებ უნგრეთის საგარეო საქმეთა მინისტრმა პეტერ სიიარტომაც დაადასტურა.
უკრაინის შეიარაღებულმა ძალებმა მილსადენზე იერიში მას შემდეგ მიიტანეს, რაც პუტინის რეჟიმმა ხარკოვში სამოქალაქო ობიექტი დაბომბა და ათი ადამიანის სიცოცხლე იმსხვერპლა.
პიტერ სიიარტომ უკრაინის მიერ მილსადენზე შეტევა დაგმო და მას “ქვეყნის ენერგოუსაფრთხოებაზე მიტანილი იერიში” უწოდა.
სიარტოს უკრაინელმა კოლეგამ, ანდრიი სიბიჰამ Druzhba-ს მილსადენზე განხორციელებულ შეტევაში უკრაინის პასუხისმგებლობა პირდაპირ არ დაადასტურა, თუმცა აღნიშნა, რომ სლოვაკეთმა და უნგრეთმა თავისი უკმაყოფილება არა უკრაინის, არამედ რუსეთისკენ უნდა მიმართონ.
