ჯორჯიის შტატში მდებარე აშშ-ის ერთ-ერთ უდიდეს ფორტ სტიუარტის სამხედრო ბაზაზე სროლის შედეგად ხუთი ამერიკელი ჯარისკაცი დაშავდა. ხელისუფლებამ ამ სამხედრო ობიექტზე „ლოკდაუნი“ დააწესა. იუწყება SkyNews.

აღნიშნულია, რომ შემთხვევის ადგილზე სამართალდამცავი ორგანოები მუშაობენ. სამხედროების ცნობით, ინციდენტი ჯავშანტექნიკის ბრიგადის მეორე საბრძოლო ჯგუფის კომპლექსში მოხდა. სამხედრო პოლიცია, ბაზა დაუყოვნებლივ ჩაკეტა.

მსროლელი, რომლის ვინაობაც არ სახელდება, დაკავებულია.

დაჭრილ სამხედროებს სამედიცინო დახმარება ადგილზე გაეწიათ, რის შემდეგაც ისინი სამხედრო ჰოსპიტალში გადაიყვანეს. სარდლობის თქმით, საზოგადოებისთვის საფრთხე არ არსებობს.

ფორტ სტიუარტი აშშ-ის უდიდესი არმიის ბაზაა მდინარე მისისიპის აღმოსავლეთით.

ბაზაზე მე-3 ქვეითი დივიზიის ათასობით ჯარისკაცი და მათი ოჯახებია განთავსებული. ინციდენტის შემდეგ, ბაზაზე არსებული სამი სკოლა, სადაც თითქმის 1400 მოსწავლე სწავლობს, ასევე დაიკეტა.

ბაზის გარეთ კიდევ სამმა სკოლამ „უსაფრთხოების მიზნით“ მსგავსი ზომები მიიღო.