განაში სამხედრო ვერტმფრენი ჩამოვარდა, რის შედეგადაც რვა ადამიანი დაიღუპა, მათ შორის თავდაცვისა და გარემოს დაცვის მინისტრები. ინფორმაციას CNN ავრცელებს.
განას პრეზიდენტის ადმინისტრაციის ხელმზღვანელის განცხადებით, ოთხშაბათს, აშანტის რეგიონში სამხედრო ვერტმფრენის ჩამოვარდნის შედეგად დაღუპულ რვა ადამიანს შორის არიან განას თავდაცვისა და გარემოს დაცვის მინისტრები.
გავრცელებული ინფორმაციით, ვერტმფრენში ეკიპაჟის სამი წევრი და ხუთი მგზავრი იმყოფებოდა, მათ შორის განას თავდაცვის მინისტრი ედვარდ ომანე ბოამა და გარემოს დაცვის მინისტრი იბრაჰიმ მურთალა მოჰამედი. ყველა მათგანი დაიღუპა.
განის შეიარაღებული ძალების განცხადებით, მათ კონტაქტი დაკარგეს Z9-ის ტიპის ვერტმფრენთან, რომელიც დედაქალაქ აკრადან სამხრეთ განას ქალაქ ობუასიში მიფრინავდა.
პრეზიდენტის ადმინისტრაციის ხელმძღვანელმა, ჯულიუს დებრამ, ვიდეომიმართვაში ავიაკატასტროფას „ეროვნული ტრაგედია“ უწოდა.
