თურქეთის პრეზიდენტმა რეჯეფ თაიფ ერდოღანმა განაცხადა, რომ 2025 წლის ზაფხულში ტყის ხანძრებთან დაკავშირებით 38 ადამიანი დააკავეს და წლევანდელი ხანძრების თითქმის ყველა შემთხვევა ადამიანური შეცდომის შედეგია. ამის შესახებ Anadolu იუწყება.
ერდოღანის თქმით, წელს ქვეყანაში ტყის ხანძრების 96% ადამიანური ფაქტორებით იყო გამოწვეული - სიგარეტის ნამწვი, ღია ცის ქვეშ დასვენების შემდეგ ჩაუმქრალი ხანძარი, მინის ნამსხვრევები, რომელიც ლინზის ფუნქციას ასრულებდა და ა.შ.
„1-ელი ივნისიდან მოყოლებული, 149 ეჭვმიტანილი დააკავეს. 38 ადამიანი კვლავ დაკავებულია, ხოლო 61-ის მიმართ სასამართლო კონტროლი გამოიყენება“, - განაცხადა თურქეთის პრეზიდენტმა.
მან აღნიშნა, რომ დაკავებულებს შორის არის ის პირი, რომელიც, სავარაუდოდ, ქვეყნის სიდიდით მეოთხე ქალაქ ბურსასთან ახლოს გაჩენილ ხანძარზეა პასუხისმგებელი.
ერდოღანმა ასევე განაცხადა, რომ თურქეთი ეფექტურად რეაგირებს ტყის ხანძრების პრობლემაზე და 2020-2024 წლების ბოლოსთვის მას ესპანეთთან, იტალიასთან, საბერძნეთთან, პორტუგალიასთან, აშშ-სთან და კანადასთან შედარებით ნაკლები დაზიანებული ტყის ფართობი ჰქონდა, ასევე ხმელთაშუა ზღვის ყველა ქვეყანასთან შედარებით მეტი სპეცთვითმფრინავი.
მისი თქმით, მთელი ქვეყნის მასშტაბით მორიგეობს 27 სპეცთვითმფრინავი, 105 ვერტმფრენი, დაახლოებით 6000 ერთეული სახმელეთო ტექნიკა და დაახლოებით 25 ათასი პროფესიონალი მეხანძრე.
თურქეთში ივნისის ბოლოდან მოყოლებული ხანძრების შედეგად დაღუპულთა რაოდენობა 17-მდე გაიზარდა.
