"საქართველოს ფოსტის" შეძენით 15 კომპანია დაინტერესებული. ეკონომიკისა და მდგრადი განვითარების მინისტრის ვერა ქობალიას განმარტებით, "საქართველოს ფოსტის" შეძენის ინტერესი ევროპულმა და აზიურმა მსხვილმა კომპანიებმა დააფიქსირეს.
"საქართველოს ფოსტის" პრივატიზაციისთვის სამინისტროში 15 განაცხადი შემოვიდა. "საქართველოს ფოსტით" დაინტერესებულები არიან დიდი კომპანიები, რომლებიც ევროპაში ასევე აზიაში ფოსტის განვითარებაში არიან ჩართულები. ეს ფაქტორები ჩვენთვის ძალიან მნიშვნელოვანია, რათა ფოსტის პრივატიზაცია სწორად მოხდეს და ეს მიმართულება გადაეცეს აუცილებლად იმ კომპანიას, რომელსაც აქვს უნარი და იმავდროულად მეტ ადამიანს დაასაქმებს"- აცხადებს "ჯი-ეიჩ-ენთან" საუბრისას ვერა ქობალია. მინისტრის თქმით, სამინისტრო შესულ განაცხადებს ეტაპობრივად განიხილავს.
"ჩვენ ეტაპობრივად და ძალიან დეტალურად განვიხილავთ შემოსულ განაცხადებს. თუმცა მიუხედავად იმისა, რომ 15 განაცხადი შემოვიდა, ძალიან დიდი მნიშვნელობა აქვს, თუ რომელ კომპანიას გადავცემთ "საქართველოს ფოსტას"- განაცხადა ვერა ქობალიამ.
შეგახსენებთ, რომ 15 იანვარს, ეკონომიკისა და მდგრადი განვითარების სამინისტროში, "საქართველოს ფოსტის" გასხვისებასთან დაკავშირებით, ინტერესთა მიღება შეწყდა.
ობიექტთან დაკავშირებით, ინვესტორთა განაცხადების მიღება სამინისტროს ჯერ კიდევ 2010 წლის 20 დეკემბერს უნდა შეეწყვიტა, თუმცა სამინისტროს ხელმძღვანელობის გადაწყვეტილებით ვადამ 2011 წლის 15 იანვრამდე გადაიწია.
"საქართველოს ფოსტის" აქციათა 100%-ის მფლობელი სახელმწიფოა და ის ქართულ საფოსტო ბაზარზე მთავარი საფოსტო ოპერატორია. კომპანია ოპერირებს მთელი ქვეყნის მასშტაბით და ფლობს დაახლოებით 87 000 კვ.მ.
მიწას და შენობებს საერთო ფართით 100 000 კვ.მ.
ეკონომიკისა და მდგრადი განვითარების სამინისტროს ინფორმაციით, კომპანიას აქვს ყველაზე სანდო საფოსტო მომსახურების გაწევის იმიჯი. მისი ოფისები მთელი ქვეყნის ტერიტორიაზეა განლაგებული.
სამინისტროში მიიჩნევენ, რომ ამ მახასიათებლების გათვალისწინებით შპს "საქართველოს ფოსტა" საუკეთესო ინვესტირების საშუალებას იძლევა.
საქართველოს მთავრობა მზადაა განიხილოს სხვადასხვა შემოთავაზება პოტენციური მყიდველების მხრიდან კომპანიის სამომავლო განვითარების შესახებ.