ირანის სისტანისა და ბელუჯისტანის პროვინციაში ბელუჯმა ტერორისტებმა სასამართლოს შენობაზე შეიარაღებული თავდასხმა განახორციელეს.
ამის შესახებ ინფორმაციას Reuters ირანის სახელმწიფო მედიაზე დაყრდნობით ავრცელებს.
თავდასხმის შედეგად 9 ადამიანი დაიღუპა, მათ შორის ერთი ბავშვი, ხოლო 22 დაშავდა.
დაღუპულთაგან სამი უსაფრთხოების ძალების თანამშრომელი იყო, რომლებიც შენობას იცავდნენ.
მოკლულია სამი ტერორისტი.
თავდასხმაზე პასუხისმგებლობა „ჯაიშ ალ-ადლის“ დაჯგუფებამ აიღო.
ტერორისტების თქმით, თავდასხმის სამიზნე მოსამართლეები იყვნენ, რომლებმაც სასიკვდილო განაჩენი გამოუტანეს და ბელუჯების სახლების დანგრევის ბრძანება გასცეს.
ბელუჯები ირანისა და პაკისტანის საზღვარზე მცხოვრები ხალხია, რომლებსაც არ გააჩნიათ საკუთარი სახელმწიფო ან ეროვნული ავტონომია. „ჯაიშ ალ-ადლი“ ერთ-ერთია იმ მრავალ შეიარაღებულ დაჯგუფებას შორის, რომლებიც ათწლეულების განმავლობაში აწარმოებენ შეიარაღებულ ბრძოლას დამოუკიდებელი ბელუჯების სახელმწიფოს დასაარსებლად.
