მიხეილ სააკაშვილის განცხადებით, საქართველოს ნავთობისა და გაზის რესურსები აქვს, თუმცა სადაც ეს რესურსებია ოკუპაციის ქვეშ იმყოფება.
"ჩვენი არ გვაქვს ნავთობი და გაზი. უფრო სწორედ, იქ სადაც ამის რესურსებია ოკუპაციის ქვეშ იმყოფება ამ მომენტში. თუმცა, ჩვენ გვაქვს მთავარი - ჩვენთან არ არის კორუფცია. არის ეფექტური სახელმწიფო აპარატი. არის ძალიან დაბალი ბიუროკრატია, მაკროეკონომიკურად ჯანსაღი სიტუაცია, მაგრამ ეს არაა საკმარისი, რომ ხალხმა იგრძნოს პროგრესის შედეგი, როცა არის ასეთი უმუშევრობა. გამოსავალი არის რამდენიმე ასეული სოფლის მეურნეობის საწარმოს შექმნა. წელს მკვეთრად გაუმჯობესდება მოსავლიანობა. ტურიზმის სექტორში არა მხოლოდ რაოდენობრივი, არამედ ხარისხობრივი ზრდა უნდა მოხდეს. ამავე დროს საჭიროა ზუსტი ხედვა იმისა თუ რა არის ჩვენი პერსპექტივა და ეს არის განათლება", - განაცხადა პრეზიდენტმა სოფელ კაჭრეთში პროფესიული ცენტრის რეაბილიტირებული შენობის გახსნისას.
პრეზიდენტმა ისაუბრა უმუშევრობის თემაზეც. მისი თქმით, უმუშევრობის გადასაჭრელად აუცილებელია ბევრი წარმოება შეიქმნას.
"უმუშევრობის გადასაჭრელად საჭიროა წარმოებები შეიქმნას. ჩვენ გვაქვს პოტენციალი უახლოეს წლებში გავაორმაგოთ ჩვენი სოფლის მეურნეობა. თუ ამას არ გავაკეთებთ, ყველაფერი რითაც უნდა ვიხეიროთ ხელიდან წაგვივა. ამიტომ ჩვენი ამოცანაა მსგავსი ტექნიკური სასწავლებლების განვითარება. აქ არის ძალიან კარგი ბაზა. 20 ათას ადამიანამდე ავდივართ წელს ტექნიკური სასწავლებლების გამომშვებელთა რაოდენობით", - აღნიშნა სააკაშვილმა.