ლატვიის საგარეო საქმეთა მინისტრმა ბაიბა ბრაჟემ აშშ-ის პრეზიდენტ დონალდ ტრამპს მოუწოდა, არ გადადოს პუტინზე ზეწოლა და რუსეთის წინააღმდეგ მეორადი სანქციები 50 დღეზე ადრე დააწესოს.
„ეს უფრო ადრე უნდა მოხდეს“, - ხაზგასმით აღნიშნა ბრაჟემ. მისი თქმით, დაგვიანება მხოლოდ ვლადიმoრ პუტინს აძლევს დროს, გააგრძელოს სამხედრო აგრესია უკრაინის წინააღმდეგ.
ბრაჟეს თქმით, რუსეთს კვლავ შეუძლია ბრძოლის გაგრძელება და სწორედ ამიტომ დასავლეთმა დაუყოვნებლივ უნდა გააძლიეროს ზეწოლა მოსკოვზე, რათა პუტინი მოლაპარაკებების მაგიდასთან დაჯდეს. მისი თქმით, სანქციების დაუყოვნებელი დაწესება შესაძლოა ამის გაკეთების ერთ-ერთი გზა იყოს.
„შეერთებული შტატები და მისი მოკავშირეები უნდა დარწმუნდნენ, რომ რუსეთმა უნდა გაიგოს, რომ ყოველი დღე მისთვის არა უკეთესი, არამედ უარესი იქნება“, - თქვა ბრაჟემ.
ბრაჟემ ასევე აღნიშნა, რომ დაზვერვამ და საერთო შეფასებამ აჩვენა, რომ პუტინს ომის დასრულების სურვილი არ ჰქონდა. მისი თქმით, ტრამპი იმავე დასკვნამდე მას შემდეგ მივიდა, რაც რუსეთისთვის „კარის ღიად დატოვებას“ ცდილობდა.
„მხოლოდ დროის საკითხი იყო, ვიდრე გაირკვეოდა, რომ პუტინი უბრალოდ ყველას ატყუებდა და დრო გაჰყავდა“, - თქვა ბრაჟემ.
14 ივლისს ტრამპმა განაცხადა, რომ „თუ რუსეთთან 50 დღის განმავლობაში შეთანხმებას ვერ მიაღწევს, მაშინ მოსკოვს 100%-მდე ტარიფებს დაუწესებს“.
„ჩვენ ძალიან მკაცრ ტარიფებს დავაწესებთ, თუ 50 დღეში შეთანხმებას ვერ მივაღწევთ, დაახლოებით 100%-იან ტარიფებს, მეორად ტარიფებს, თქვენ იცით, რას ნიშნავს ეს“, - განაცხადა დონალდ ტრამპმა.
