თეთრი სახლის პრესმდივანმა ქეროლაინ ლევიტმა განაცხადა, რომ აშშ-ის პრეზიდენტ დონალდ ტრამპსა და უკრაინის ლიდერ ვოლოდიმირ ზელენსკის შორის გამართული უახლესი სატელეფონო საუბრისას მოსკოვზე შესაძლო „დარტყმის“ შესახებ მედიაში გავრცელებული ინფორმაცია კონტექსტიდან არის ამოგლეჯილი.
მანამდე გამოცემები Financial Times და The Washington Post ინფორმაციას ავრცელებდნენ, რომ სატელეფონო საუბრის დროს ტრამპმა ზელენსკის ჰკითხა, შეუძლია თუ არა უკრაინას მოსკოვსა და სანქტ-პეტერბურგზე [The Washington Post-ის მიხედვით რატომ არ დაარტყა მოსკოვს] დარტყმების განხორციელება.
Financial Times-ის წყაროს ცნობით, ტრამპს სურდა, რომ “მათ [რუსეთს] ტკივილი ეგრძნოთ” და რუსეთი სამშვიდობო მოლაპარაკებებისკენ ებიძგა. Washington Post-ის ინფორმაციით კი, ზელენსკიმ დაადასტურა, რომ უკრაინას რუსეთის დედაქალაქზე დარტყმის განხორციელება შეუძლია. „ჩვენ ეს შეგვიძლია, თუ იარაღს მოგვცემთ“, - თქვა ზელენსკიმ.
ამ ცნობების კომენტირებისას თეთრი სახლის პრესმდივანმა Financial Times “ნახვების მოსაპოვებლად სიტყვების კონტექსტიდან ამოგლეჯვაში” დაადანაშაულა.
“პრეზიდენტი ტრამპი უბრალოდ კითხვას სვამდა, მეტ მკვლელობას არ ახალისებდა. დაუღალავად მუშაობს მკვლელობების შესაჩერებლად და ამ ომის დასასრულებლად”, - განაცხადა ლევიტმა.
