იანვარში ბიუჯეტში პროფიციტულია და მასში 36,7 მლნ. ლარით მეტი რესურსები იქნა მობილიზებული. ამის შესახებ განცხადება დღეს ფინანსთა მინისტრმა კახა ბაინდურაშვილმა გააკეთა. მინისტრის თქმით, 2011 წლის იანვარი ფისკალურად საკმაოდ წარმატებული იყო, რადგანაც იანვრის თვის ბიუჯეტი არის პროფიციტული.
"2011 წლის იანვარი, გასული წლებისაგან განსხვავებით, ფისალურად კარგი შედეგებით დასრულდა. ზოგადად იანვარში, ეკონომიკური აქტიობა, კლიმატური პირობებისა და ბუნებრივი ფაქტორების გათვალისწინებით, ნაკლებია, მაგრამ წელს შედარებით უკეთესი მდგომარეობა იყო. იანვარში ეკონომიკური აქტიობა იქნა შენარჩუნებული და რაც მთავარია იანვრის თვე გახლავთ პროფიციტური. მიუხედავად იმისა, რომ დეფიციტი 2011 წლის განმავლობაში 4,5 %-ის დონეზე გვაქვს დაგეგმილი, ჩვენ მაქსიმალურად ვცდილობთ ისეთი ღონისძიებების გატარებას, რომ 2011 წლის პირველ ნავევარი იყოს დასტაბილურებული. ვცდილობთ, ვიდრე ტურისტული სეზონი დაიწყება, იქნება სავალუტო შემოდინება და მოსახლეობა მოსავალს აიღებს, რაც ფასების დასტაბილურებას შეეშველება, რომ ყოველი თვის ბიუჯეტი იყოს სტაბილური"- აცხადებს კახა ბაინდურაშვილი.
ქვეყნის მთავარი ფინანსისტის განმარტებით, იანვარის თვის ბიუჯეტი იყო პროფიციტული და ხაზინაში 36 მლნ. ლარით ჭარბი რესურსები იქნა მობილიზებული. ანუ სახელმწიფომ 36 მლნ. ლარით ნაკლები დახარჯა უკან ეკონომიკაში ვიდრე ამოიღო, რაც ინფლაციის კონტროლის კუთხით ცალსახად მნიშვნელოვანია.
მისი განმარტებით, მონეტარული პოლიტიკის გამკაცრების ხარჯზე რასაც ეროვნული ბანკი აკეთებს და ის ფისკალური პოლიტიკა, რომელსაც სახელმწიფო ატარებს, საერთო ჯამში შედეგს გამოიღებს და ინფლაციის წნეხი შესუსტდება.
"რაც შეეხება 2011 წლის იანვრის შემოსავლებს შემოსავლებს საკმაოდ წარმატებული იყო. უკვე მეორე წელია რაც ფინანსთა სამინისტროს შემოსავლების კუთხით ყოველთვიური გეგმა აღარ აქვს, თუმცა იანვრის შემოსავლები ცალსახად მიუთითებს, რომ წლის ბიუჯეტის შესრულებას არანაირი პრობლემა არ შეექმნება", _ აცხადებს ბაინდურაშვილი.
იანვრის პროფიციტი წლიურ მშპ-სთან 0,2 %-ია.