ეკონომიკისა და მდგრადი განვითარების სამინისტროს პრესსპიკერის გიორგი კალანდაძის განმარტებით, დანიელ გუფთა წარმოადგენს კომპანია "ამტელ-პროპერტიეს" ერთ-ერთ დირექტორს.

მისივე ინფორმაციით, აღნიშნული კომპანია ახორციელებს საინვესტიციო საქმიანობას ისეთი ქვეყნების უძრავ ქონებაში, როგორიცაა: სინგაპური, ინდოეთი, გაერთიანებული სამეფო, დამოუკიდებელ სახელმწიფოთა თანამეგობრობის ქვეყნები და საქართველო.

ეკონომიკისა და მდგრადი განვითარების სამინისტროში განმარტავენ, რომ პირველი მსხვილი ინვესტიცია არამიანცის კლინიკებში ხორციელდება დანიელ გუფთას მიერ, რომელმაც გასულ თვეს ჩატარებული საჯარო აუქციონის მეშვეობით არამიანცის საავადმყოფოს ტერიტორიაზე 4 კლინიკა შეიძინა. ინვესტორმა ვალდებულება აიღო, რომ ოთხივე კლინიკის პროფილს 7 წლის განმავლობაში შეინარჩუნებს.

"სამინისტრო იმედოვნებს, რომ პირველი კლინიკური საავადმყოფოს ტერიტორიაზე განლაგებულ კლინიკებში განხორციელდება მნიშვნელოვანი ინვესტიცია, რის შედეგადაც თბილისში იფუნქციონირებს თანამედროვე სტანდარტების მრავალპროფილური საავადმყოფო, რომელიც მაღალი დონის სერვისს გაუწევს, როგორც ადგილობრივ, ისე უცხოეთიდან სამკურნალოდ ჩამოსულ პაციენტებს", - განაცხადა გიორგი კალანდაძემ.

კალანდაძის განმარტებით, 8 თებერვალს დაგეგმილია აუქციონი, სადაც გამოტანილი იქნება ე.წ. არამიანცის ტერიტორიაზე მდებარე კიდევ სამი კლინიკა: "თორაკო-აბდომინალური კლინიკა", რომლის საწყისი ღირებულება 2 მილიონი ლარითაა განსაზღვრული; "თბილისის ექსპერიმენტალური სამშობიარო სახლი", საწყისი ფასით 850 ათასი ლარი და "ანესთეზიოლოგიური კლინიკა", საწყისი ფასით 50 ათასი ლარი.

შეგახსენებთ, რომ 25 იანვარს დანიელ გუფთამ ეკონომიკისა და მდგრადი განვითარების სამინისტროსგან 330 ათას ლარად "ზოგადი თერაპიის კლინიკა", 740 ათას ლარად შპს "ძმები ზუბალაშვილების სახელობის პედიატრიული კლინიკა" და 500 ათას ლარად შპს "თვალის სნეულებათა კლინიკა მზერა" შეიძინა. ხოლო 20 იანვარს გუფთამ 720 ათას ლარად "გინეკოლოგიური კლინიკა" შეიძინ.