რუსეთის ხელისუფლების განცხადებით, 4 ივლისის ღამეს დრონებით თავდასხმა განხორციელდა როსტოვის ოლქში და მოსკოვთან, სერგეევ-პოსადის რაიონში რამდენიმე დასახლებულ პუნქტზე.
რუსეთის ხელისუფლების განცხადებით, 4 ივლისის ღამეს დრონებით თავდასხმა განხორციელდა როსტოვის ოლქში და მოსკოვის მახლობლად სერგეევ-პოსადის რაიონში რამდენიმე დასახლებულ პუნქტზე.
ინფორმაციას როსტოვის ოლქის გუბერნატორი იური სლიუსარი და რუსეთის ტავდაცვის სამინისტრო ავრცელებენ.
სლიუსარის თქმით, დრონებმა როსტოვის ოლქის რამდენიმე ქალაქს ერთდროულად შეუტიეს.
მისი თქმით, ქალაქ აზოვში, რამდენიმე მანქანა დაზიანდა, საცხოვრებელი შენობების ფანჯრები ჩაიმსხვრა, ხოლო ერთ-ერთი უპილოტო საფრენი აპარატის ფრაგმენტები, სავარაუდოდ, ადგილობრივ სტადიონზე დაეცა.
რუსეთის ხელისუფლების ცნობით, სოფელ დოლოტინკაში დრონმა საცხოვრებელი კორპუსი დაანგრია: იატაკი ჩაინგრა, რის შედეგადაც ერთი ადამიანი დაიღუპა. ოფიციალური პირების ცნობით, დაზიანებული შენობიდან 20 მცხოვრების ევაკუაცია განხორციელდა.
რუსი ოფიციალური პირები ასევე იუწყებიან მოსკოვის მახლობლად, სერგეევ პოსადის რაიონში უპილოტო საფრენი აპარატის თავდასხმის შესახებ. ქალაქის რაიონის ხელმძღვანელის თქმით, თავდასხმის დროს ქვესადგური დაზიანდა. სოციალურ ქსელში გავრცელებულ ვიდეოებში ჩანს, როგორ ამოდის ქალაქზე კვამლის სვეტი.
მოგვიანებით, რუსეთის თავდაცვის სამინისტრომ განაცხადა, რომ ღამის განმავლობაში საჰაერო თავდაცვის სისტემებმა გაანადგურეს და ჩაჭრეს 48 უკრაინული დრონი. კერძოდ, როსტოვის ოლქში - 26, კურსკის ოლქში -12, ბელგოროდის ოლქში - 6, ორიოლის ოლქში - 3 და ლიპეცკის ოლქში 1 უპილოტო საფრენი აპარატი ჩამოაგდეს.
