უკრაინის პრეზიდენტი ვოლოდიმირ ზელენსკი და დიდი ბრიტანეთის პრემიერ-მინისტრი კირ სტარმერი სამხედრო წარმოების სფეროში ახალ პარტნიორობაზე შეთანხმდნენ.
თანამშრომლობის უახლესი ფორმატი ორშაბათს, 23 ივნისს, ჰააგაში დაგეგმილ ნატო-ს სამიტამდე გამოცხადდა.
„ჩვენ განვიხილეთ კონფლიქტთან დაკავშირებული საკითხები და კიდევ რა შეგვიძლია გავაკეთოთ მხარდასაჭერად“, - თქვა სტარმერმა.
„ძალიან ვამაყობ, რომ დღეს შუადღისას შეგვიძლია გამოვაცხადოთ ერთობლივი სამრეწველო თავდაცვის წარმოების შესახებ შეთანხმება - პირველი ასეთი სახის შეთანხმება უკრაინისა და გაერთიანებული სამეფოსთვის“, – განაცხადა სტარმერმა.
მისივე თქმით, შეთანხმება უზარმაზარი წინგადადგმული ნაბიჯი იქნება იმ წვლილის თვალსაზრისით, რომლის გაგრძელებაც შესაძლებელია.
უკრაინის პრეზიდენტის ვოლოდიმირ ზელენსკის განცხადებით, მთავარი მიზანია რუსული ტერორის შეჩერება და რუსეთის იძულება, დაამყაროს მშვიდობა .
„შეხვედრიდან კარგი შედეგია - დამატებითი გადაწყვეტილება ერთობლივი წარმოების შესახებ. მჯერა, რომ ეს გააძლიერებს ჩვენს ორივე ქვეყანას. განსაკუთრებული ყურადღება დაეთმო ჩვენი საჰაერო თავდაცვის გაძლიერებას. ჩვენ ასევე გვაქვს შეთანხმებები ამ საკითხთან დაკავშირებით. მნიშვნელოვანი საკითხია რუსეთის წინააღმდეგ ახალი სანქციების შემოღება. ზეწოლა უნდა განხორციელდეს ენერგეტიკისა და საბანკო სექტორებზე, ჩრდილოვან ფლოტზე, კომპანიებზე, რომლებიც ამარაგებენ ორმაგი დანიშნულების კომპონენტებს, რომლებიც გამოიყენება დრონებისა და რაკეტების წარმოებაში, ასევე ყველა იმ პირზე, ვინც ჩართულია „ორეშნიკის“ სარაკეტო სისტემის წარმოებაში. ყველაფერი, რაც პუტინს ეხმარება იარაღის წარმოების გაფართოებაში, უნდა დაიბლოკოს“, - წერს ზელენსკი.
შეგახსენებთ, უკრაინის პრეზიდენტი ლონდონში გუშინ ჩავიდა.
