საქართველოს გარემოს დაცვისა და სოფლის მეურნეობის მინისტრი დავით სონღულაშვილი, საფრანგეთის რესპუბლიკის ქალაქ ნიცაში გამართული გაეროს მაღალი დონის კონფერენციის ფარგლებში, არაბთა გაერთიანებული საამიროების კლიმატის ცვლილებისა და გარემოს დაცვის მინისტრ ამნა ბინტ აბდულა ალ დაჰაკს შეხვდა.
შეხვედრაზე მხარეებმა კლიმატის ცვლილებასთან ბრძოლის გზებზე, გარემოსდაცვით საკითხებზე და ორ ქვეყანას შორის თანამშრომლობის გაღრმავების პერსპექტივებზე ისაუბრეს. განსაკუთრებული ყურადღება დაეთმო მწვანე ტექნოლოგიების განვითარებასა და მდგრადი განვითარების მხარდაჭერას.
დავით სონღულაშვილმა ხაზი გაუსვა კლიმატის ცვლილებით გამოწვეულ კრიზისთან გამკლავებაში საერთო ძალისხმევის მნიშვნელობას.
მხარეებმა მზაობა გამოთქვეს, გააგრძელონ მჭიდრო დიალოგი და თანამშრომლობა რეგიონული და გლობალური გარემოსდაცვითი გამოწვევების ერთობლივად გადასაჭრელად; ასევე, კიდევ უფრო გააღრმაონ საქართველოსა და არაბთა გაერთიანებულ საამიროებს შორის საქმიანი ურთიერთობები კონკრეტული პროექტების დონეზე.
შეხვედრას, მინისტრ დავით სონღულაშვილთან ერთად, მინისტრის პირველი მოადგილე ნინო თანდილაშვილი ესწრებოდა.
ინფორმაციას გარემოს დაცვისა და სოფლის მეურნეობის სამინისტროს პრესსამსახური ავრცელებს
